Böyük Britaniyada hakim Leyboristlər Partiyasının yeni lideri Endi Börnhem bu gün rəsmi olaraq ölkənin baş naziri vəzifəsini icra etməyə başlayacaq. O, istefa verən Kir Starmeri əvəz edəcək və 2016-cı ildən bəri Böyük Britaniyanın yeddinci baş naziri olacaq.
Bizimyol.info xəbər verir ki, Börnhem əvvəlcə Bukinqem sarayında Kral III Çarlzla görüşəcək. Monarxın ona yeni hökuməti formalaşdırmaq tapşırığını verməsindən sonra o, rəsmən baş nazir statusu qazanacaq. Britaniya siyasi ənənəsində bu mərasim "əl öpmə" ("Kissing of Hands") adlansa da, əslində tərəflər sadəcə əl sıxırlar.
Daha sonra yeni baş nazir Dauninq-strit 10 ünvanındakı iqamətgahın qarşısında xalqa ilk müraciətini edəcək və ilk Nazirlər Kabinetinin tərkibini açıqlayacağı gözlənilir.
Kir Starmer isə Bukinqem sarayına gedərək Kral III Çarlza istefasını təqdim edəcək. Bununla da hakimiyyətin sülh yolu ilə ötürülməsi prosesi başa çatacaq.
Britaniya qanunvericiliyinə əsasən, hakim partiya liderini dəyişdiyi halda növbədənkənar ümumi seçki keçirilməsi tələb olunmur. Endi Börnhem Leyboristlər Partiyasının liderliyi uğrunda yarışda yeganə namizəd olub. Növbəti parlament seçkiləri ən geci 2029-cu ildə keçirilməlidir, lakin baş nazir istənilən vaxt erkən seçki elan etmək səlahiyyətinə malikdir.
56 yaşlı Endi Börnhem daha əvvəl Leyborist hökumətlərində müxtəlif vəzifələrdə çalışıb. O, 2017-ci ildən Böyük Mançesterin meri olub və regionda iqtisadi inkişaf, ictimai nəqliyyatın modernləşdirilməsi və yerli idarəetmənin gücləndirilməsi istiqamətində fəaliyyəti ilə tanınıb. Siyasətçi ölkə üzrə də bu modeli tətbiq edəcəyini, iqtisadi artımı sürətləndirməyi, səlahiyyətlərin mərkəzdən regionlara verilməsini təmin etməyi və siyasətə ictimai etimadı bərpa etməyi vəd edir.
Hakimiyyət dəyişikliyi 2024-cü ildə keçirilən parlament seçkilərində böyük qələbə qazanan Kir Starmerin son aylarda azalan ictimai dəstəyi və Leyboristlər Partiyasının yerli seçkilərdə zəif nəticələrindən sonra istefa verməsi ilə baş verib. Britaniya siyasi dairələri Endi Börnhemin hakimiyyətə gəlişinin ölkədə son illər müşahidə olunan tez-tez baş nazir dəyişikliklərinə son qoyacağına ümid edir.
Bizimyol.info
