İran Xarici İşlər Nazirliyinin sözçüsü İsmayıl Bəqai ABŞ-ın İrana, o cümlədən mülki infrastruktura endirdiyi zərbələrin "İslam Dövləti" (İŞİD) terror qruplaşmasının fəaliyyətinə bənzədiyini deyib.

Bizimyol.info xəbər verir ki, bu barədə diplomat brifinqdə çıxışı zamanı bildirib.

"Çabahardakı müşahidə qüllələrinə, eləcə də körpülərə və elektrik stansiyalarına endirilən zərbələr "İslam Dövləti" qruplaşmasının həyata keçirdiyi terror aktlarını xatırladır", - deyə söyləyib.

ABŞ-la İran arasında növbəti gərginlik dalğası iyulun 8-də başlayıb. Vaşinqton və Tehran arasında memorandum imzalandıqdan sonra ABŞ Silahlı Qüvvələri ilk dəfə olaraq İran ərazisinə bir neçə silsilə hava zərbəsi endirib. Vaşinqton bu hücumların Hörmüz boğazında ticarət gəmisinə edilən hücuma cavab olaraq həyata keçirildiyini bildirib.

Həmin gün ABŞ Prezidenti Donald Tramp İranla qüvvədə olan atəşkəs rejiminin dayandırıldığını açıqlayıb. Buna cavab olaraq Tehran Bəhreyn, İordaniya, Qətər, Küveyt, Birləşmiş Ərəb Əmirlikləri və Omanda yerləşən ABŞ hərbi obyektlərinə zərbələr endirməyə başlayıb.

Bizimyol.info