Böyük Britaniya hökuməti uzun müddətdir gecikən müdafiə investisiya planını yaxın günlərdə açıqlamağa hazırlaşır. Yeni plan çərçivəsində müdafiə sahəsinə əlavə 1,5 milyard funt sterlinq ayrılıb və bu vəsaitin böyük hissəsi dron texnologiyalarının inkişafına yönəldiləcək.

Bizimyol.info xəbər verir ki, məlumata görə, ümumi xərclərin artırılması Rusiyadan və İrandan qaynaqlanan təhlükələrin qarşısını almaq məqsədi daşıyır. Beləliklə, dronlara ayrılan vəsait əvvəl planlaşdırılan 4 milyard funtdan 5 milyard funta yüksəldilib.

Müdafiə büdcəsində yaranan 18 milyard funtluq kəsirlə bağlı mübahisələr əvvəlki müdafiə naziri Con Healeyin istefasına səbəb olmuşdu. Lakin yeni müdafiə naziri Dan Jarvis aparılan danışıqlardan sonra xəzinə ilə razılıq əldə edərək kəsirin bir hissəsini azaltmağa nail olub.

Böyük Britaniyanın NATO qarşısındakı öhdəlikləri ilə bağlı narahatlıqlar artsa da, NATO-nun baş katibi Mark Rutte ölkənin öhdəliklərini yerinə yetirəcəyinə inandığını bildirib.

Baş nazir Keir Starmer planın təqdimatını çərşənbə axşamı bir müdafiə şirkətində həyata keçirəcək. Planın həm milli təhlükəsizliyi gücləndirməsi, həm də yeni iş yerləri yaratması gözlənilir.

Layihə çərçivəsində Kral Donanmasına pilotsuz sürətli qayıqlar veriləcək və bu texnikaların Hörmüz boğazında potensial sülhməramlı əməliyyatlarda istifadə olunması nəzərdə tutulur.

Bundan əlavə, Britaniya Donanması hava hücumundan müdafiə üçün altı “hibrid” freqat inşa etməyi planlaşdırır. Bu gəmilərin 2030-cu illərin ortalarında mövcud “Type 45” esmineslərini əvəz edəcəyi bildirilir.

Qadir, Bizimyol.info