2026-cı ilin əvvəlində yaradılan Sülh Şurası müharibədən sonrakı Qəzza zolağının idarə olunması üçün hazırlıqları davam etdirir. Planın mərkəzində Qəzza Zolağının İdarə olunması üzrə Milli Komitə (NCAG) dayanır. ABŞ tərəfindən HƏMAS-a alternativ kimi nəzərdən keçirilən bu struktur fələstinli texnokratlardan ibarətdir və artıq Kipr və Misirdə keçirilən seminarlar vasitəsilə mülki idarəetmə, təhlükəsizlik və infrastrukturun bərpası üzrə təlimlərə cəlb olunub.

Bizimyol.info xəbər verir ki, "The Times of Israel"in verdiyi məlumata görə, proses ciddi diplomatik aktivliklə müşayiət olunsa da, əsas maneə HƏMAS-ın tərksilah edilməməsidir. Qruplaşmanın silahı təhvil verməkdən imtinası texnokratların Qəzzaya daxil olmasını da faktiki olaraq çətinləşdirir. Sülh Şurasının xüsusi nümayəndəsi Nikolay Mladenov bu vəziyyətin prosesi dalana saldığını bildirir.

Eyni zamanda Misir, Qətər və Türkiyənin vasitəçiliyi ilə aparılan danışıqlarda İsrail hökumətinin, Baş nazir Benjamin Netanyahu rəhbərliyi altında Beynəlxalq Sabitlik Qüvvələrinin yerləşdirilməsinə hələ razılıq verməməsi də əlavə maneə kimi qiymətləndirilir.

NCAG 12 komissardan ibarət strukturla səhiyyə, təhsil, maliyyə və təhlükəsizlik kimi sahələri əhatə edir. Komandanın hazırlığına Qlobal Dəyişikliklər İnstitutu nəzarət edir. Planlar arasında rəqəmsal iqtisadiyyatın tətbiqi, “rəqəmsal pul kisələri” sisteminin yaradılması və köçkünlər üçün müvəqqəti yaşayış zonalarının inşası da var.

Bununla belə, Sülh Şurasının planının icra tarixi hələ müəyyən edilməyib. Ekspertlər xəbərdarlıq edirlər ki, uzunmüddətli keçid dövrü həm legitimlik, həm də təhlükəsizlik baxımından əlavə risklər yarada bilər. Vaşinqton isə hazırda Qəzzanın bəzi bölgələrində mərhələli bərpa və təhlükəsizlik nəzarəti altında layihələrin başlanması variantlarını nəzərdən keçirir.

Bizimyol.info