Polşanın xarici işlər naziri Radoslav Sikorski Ukrayna müharibəsi ilə bağlı Rusiya ilə mümkün danışıqlarda “Avropa üçlüyü”nün (Böyük Britaniya, Almaniya və Fransa) aparıcı roluna etiraz edərək Varşavanın da bu prosesə daxil edilməsini tələb edib.

Bizimyol.info xəbər verir ki, Sikorski Almaniyanın "Frankfurter Allgemeine Sonntagszeitung" qəzetinə müsahibəsində bildirib ki, Polşa həm Rusiya, həm də Ukraynanın qonşusu kimi danışıqlarda birbaşa maraqlı tərəfdir. O vurğulayıb ki, Qərbin Ukraynaya göndərdiyi silahlar Polşa ərazisindən keçir və bu ölkə həmin prosesdə təhlükə və riskləri birbaşa daşıyır.

“Biz bu riskləri daşıyırıq, buna görə də danışıqlar masasında yer tələb edirik,” – deyə o bildirib.

Nazirin sözlərinə görə, “Avropa üçlüyü” Avropa İttifaqının üçdə birini təmsil etsə də, bütün İttifaqın maraqlarını tam əhatə etmir. O əlavə edib ki, Almaniya və Fransa mərkəzli yanaşma Avropa İttifaqının miqyası üçün kifayət deyil.

Sikorski təklif edib ki, Rusiya ilə mümkün danışıqlar ya Avropa İttifaqının rəsmi institutları vasitəsilə, ya da “istəklilər koalisiyası” formatında aparılmalıdır.

Qeyd olunur ki, gələn həftə Berlin şəhərində Böyük Britaniya, Almaniya, İtaliya, Polşa və Fransanın daxil olduğu “E5” formatında Ukrayna məsələsinə dair görüş keçiriləcək.

Eyni zamanda Avropa İttifaqı daxilində Rusiya ilə danışıqların vaxtı və formatı barədə fikir ayrılıqları qalmaqdadır. Brüsseldə keçirilən Aİ sammitində iştirakçıların böyük əksəriyyəti Ukrayna münaqişəsi ilə bağlı Rusiya ilə danışıqları dəstəkləyərək Avropa Şurasının prezidenti Antonio Kostanı dəstəkləyib. Fransa və Almaniya danışıqlar üçün "indi uyğun vaxt deyil" hesab edərək təklifə qarşı çıxdılar. Danimarka, Hollandiya və Estoniya da onlara qoşulub. Onlar Kostanı tənqid edərək onun davranışını "son dərəcə qeyri-peşəkar" adlandırdılar.

Bizimyol.info