Təhsilverənlər üçün geyimlə bağlı hüquqi əsas yaradılır.

Milli Məclisdə müzakirəyə çıxarılan “Ümumi təhsil haqqında” Qanuna dəyişiklik layihəsinə əsasən, dövlət ümumi təhsil müəssisələrində çalışan müəllimlər üçün geyimlə bağlı tələblər müəyyənləşdirilir.

Layihədə həmçinin məktəbli forması ilə bağlı müəyyən edilmiş qaydalara əməl olunmasının valideynlərin və ya digər qanuni nümayəndələrin vəzifələri sırasına daxil edilməsi təklif edilir.

Bildirilib ki, təhsilverənlər üçün geyimlə bağlı hüquqi əsasın yaradılması da dövlət ümumi təhsil müəssisələrində peşəkar iş mühitinin və təşkilati mədəniyyətin daha da möhkəmləndirilməsinə yönəlib.

Müəllim yalnız bilik və bacarıqları şagirdlərə çatdıran şəxs deyil, eyni zamanda, davranışı, ünsiyyət mədəniyyəti və peşəkar görünüşü ilə onlar üçün nümunə rolunu yerinə yetirir. Bu baxımdan müəllimin işgüzar üslubda olması onun peşəkar statusunu, məsuliyyətini və təhsil müəssisəsinin nümayəndəsi kimi daşıdığı missiyanı daha dolğun şəkildə ifadə edir. Səliqəli, sadə və işgüzar geyim müəllimin pedaqoji fəaliyyətinin səmərəli təşkili baxımından mühüm amillərdən hesab olunur. Belə görünüş dərs prosesində diqqətin əsas məqsəddən yayınmamasına kömək edir, müəllimin sinfi idarəetmə bacarıqlarını və ünsiyyət effektivliyini dəstəkləyir

• Müəllimlər üçün vahid geyim tələbinə ehtiyac varmı?
• Geyim tələblərinin qanunla tənzimlənməsi təhsil mühitinə hansı təsiri göstərə bilər?

Bu barədə Bizimyol.info xəbər portalına danışan təhsil eksperti, publisist Şəmsi Qoca bildirib ki, şagird qarşısında eyni ciddiyətdə və səliqədə dayanan pedaqoqlar bərabərlik və intizam rəmzinə çevrilirlər:

“Milli Məclisdə müzakirəyə çıxarılan “Ümumi təhsil haqqında” Qanuna dəyişiklik layihəsi və təhsilverənlər üçün geyimlə bağlı hüquqi əsasın yaradılması təklifi həm pedaqoji mühitdə, həm də bütövlükdə cəmiyyətdə dərin rəqabət və fikir mübadiləsi doğuran fundamental bir məsələdir. Müəllimlik peşəsi sadəcə sinif otağında mühazirə oxumaqdan ibarət deyil; o, bəşəriyyətin mənəvi təməllərini atan, sözü, davranışı və bəli, xarici görkəmi ilə gələcək nəslin şüurunda silinməz izlər qoyan canlı nümunədir. Bu baxımdan, müəllimlər üçün vahid geyim tələbinin tətbiqi və bu məsələnin qanunvericilik səviyyəsinə qaldırılması təhsil mühitində köklü vizual və psixoloji dəyişikliklərə yol aça bilər.

Təhsilverənlər üçün müəyyən bir geyim etikasının mövcudluğu məktəb divarları arasında rəsmi, akademik və işgüzar ab-havanın bərqərar olmasına birbaşa xidmət edir. Şagird qarşısında eyni ciddiyətdə və səliqədə dayanan pedaqoqlar həm də məktəbdə sosial-iqtisadi fərqliliklərin vizual təzahürünü aradan qaldırır, bərabərlik və intizam rəmzinə çevrilirlər. Lakin burada incə bir sərhəd var; müəllimlik həm də fərdi yaradıcılıq və azad təfəkkür sahəsidir. Bu səbəbdən geyim tələblərinin həddindən artıq sərt şablonlara salınması müəllimin daxili azadlığını və fərdiliyini buxovlamamalı, əksinə, klassik işgüzar üslubun zərifliyi ilə onun nüfuzunu daha da ucaltmalıdır”.

Şəmsi Qoca həmçinin deyib: “Bu dəyişikliyin qanunla tənzimlənməsi təhsil mühitinə həm müsbət, həm də böyük həssaslıq tələb edən təsirlər göstərə bilər. Müsbət tərəfi odur ki, cəmiyyətin şüuraltında yer alan o ali "müəllim obrazı" vizual cəhətdən yenidən bərpa olunur və məktəb daxilində güclü bir təşkilati mədəniyyət formalaşır. Eyni zamanda, valideynlərin də məktəbli forması qaydalarına əməl etməsinin qanuni bir vəzifə olaraq təsbit edilməsi ailə ilə məktəb arasında vahid nizam-intizam zənciri yaradır.

Bununla belə, qanunun icra mexanizmləri hazırlanarkən müəllimlərin psixoloji rahatlığı, seçiləcək geyimlərin fəsillərə uyğunluğu, hərəkət dinamikasına mane olmaması və müəllimlərin sosial rifahı hökmən nəzərə alınmalıdır ki, bu addım inzibati təzyiq kimi deyil, peşəkar bir imic islahatı kimi qəbul edilsin”.

Şəmsi Qoca əlavə edib: “Geyim təhsilin birbaşa məzmununu və keyfiyyətini dəyişməsə də, o məzmunun şagirdə hansı ehtiram və ciddiyətlə təqdim olunacağını müəyyən edən ən mühüm vizual vasitədir. Müəllim öz görkəmi ilə auditoriyaya heyranlıq və hörmət aşılamalıdır. Bu qanun layihəsi təhsil müəssisələrimizə itirilmiş o klassik akademik estetikaya qayıtmaq üçün hüquqi zəmin yaradır, lakin başlıca hədəf müəllimi çərçivəyə salmaq yox, onun cəmiyyətdəki ali məqamını xarici harmoniya ilə tamamlamaq olmalıdır”.

Günel Həsənova, Bizimyol.info