Rusiya Ukraynada cəbhədə çıxılmaz vəziyyətlə üzləşib və Avropa paytaxtlarında Vladimir Putinin münaqişəni Avropaya genişləndirərək vəziyyəti dəyişməyə cəhd edə biləcəyi ilə bağlı narahatlıqlar artır.
Bizimyol.info xəbər verir ki, bu barədə "The Wall Street Journal" (WSJ) yazıb.
Nəşrin məlumatına görə, bəzi Avropa təhlükəsizlik rəsmiləri Rusiyanın NATO-nun birliyini yoxlamaq üçün Baltikyanı ölkələrdən birinə, Baltik dənizindəki İsveç və ya Danimarka adalarına, yaxud Arktikadakı alyans ərazilərinə zərbə endirə biləcəyini istisna etmir.
Eyni zamanda, ABŞ prezidenti Donald Trampın NATO-dan çıxmaqla bağlı hədələri və Avropadakı Amerika hərbi kontingentini azaltmaq istiqamətində atdığı addımlar bu narahatlıqları daha da gücləndirir.
Nəşr yazır ki, Avropanın yüksəkvəzifəli rəsmiləri yaxın 12 ay ərzində Rusiyanın mövqelərini gücləndirmək üçün fürsət görməsindən ehtiyat edirlər. Onların fikrincə, İranda müharibə səbəbindən yaranan enerji böhranı Avropada siyasi gərginliyi artıraraq Rusiya nefti və qazının yenidən alınmasını, həmçinin Ukraynaya yardımın dayandırılmasını tələb edən ifrat sağçı partiyaları gücləndirə bilər.
Bununla belə, Avropa kəşfiyyat və hərbi qurumları Rusiyanın Baltikyanı ölkələrə və ya NATO ərazilərinə hücum üçün real qoşun və texnika yığdığına dair hazırda heç bir əlamət görmür.
Ekspertlərin fikrincə, Putini yaxın aylarda çətin seçim gözləyir. Qərb kəşfiyyatının qiymətləndirmələrinə əsasən, Rusiya ordusu ayda təxminən 35 min hərbçi itirir və bu, yeni əsgər cəlb etmək imkanlarını aşır. Bu isə müharibənin indiki tempdə davamını çətinləşdirir və Kreml üçün məcburi səfərbərlik ehtiyacını yarada bilər.
Avropa İttifaqının xarici siyasət üzrə ali nümayəndəsi Kaya Kallas bildirib ki, belə bir addım Putinin “qələbə qazanmadığını” etiraf etməsi kimi görünə bilər və bu, Moskvanı vəziyyəti daha da gərginləşdirməyə vadar edə bilər.
Eyni zamanda, "WSJ" qeyd edir ki, Putin hələ də Ukraynada qələbənin yaxın olduğunu iddia edir və onun Avropada güc balansını dəyişmək strategiyasının dəyişdiyinə dair heç bir əlamət yoxdur.
Məqalədə vurğulanır ki, Rusiya üçün Avropa İttifaqı Ukraynaya əsas dəstək verən tərəf olaraq düşmən kimi qəbul edilir və Moskva tərəfindən zəiflədilməli və ya cəzalandırılmalı hesab olunur.
Bəzi ekspertlər hesab edir ki, Rusiya ordusu Avropa ordularına qarşı Ukraynaya nisbətən daha yaxşı nəticə göstərə bilər, xüsusilə də ABŞ dəstəyi gecikərsə. Lakin belə bir eskalasiya üçün Rusiyanın əvvəlcə ordusunu ciddi şəkildə gücləndirməsi lazım gələcək.
Estoniya Xarici Kəşfiyyat Xidmətinin rəhbəri Kaupo Rosin bildirib ki, səfərbərlik texniki baxımdan mümkündür, lakin bu, ölkə daxilində ciddi sosial və siyasi risklər yarada bilər.
Almaniyalı deputat Norbert Röttgen isə hesab edir ki, müharibəni NATO ölkələrinə genişləndirmək Putinə əlavə və böyük risklər gətirər, lakin onun riskli qərarlar vermək qabiliyyəti də nəzərə alınmalıdır.
Son dövrlərdə Rusiya Baltikyanı ölkələr və Finlandiyanı Ukraynaya qarşı hücumlara şərait yaratmaqda ittiham edir. Rusiya Müdafiə Nazirliyi isə Avropadakı bəzi şirkətlərin ünvanlarını yayımlayaraq “nəticələr” barədə xəbərdarlıq etməyə başlayıb.
Bizimyol.info
