“Ümumdünya Şəhərsalma Forumunun (WUF13) ən genişmiqyaslı sessiyalardan biri kimi yadda qalması təşkilati uğurla yanaşı, həm də Azərbaycanın beynəlxalq müstəvidə artan rolunun növbəti təsdiqi kimi qiymətləndirilə bilər. Bu forumdan əvvəl ölkəmiz artıq COP29 kimi qlobal əhəmiyyətli tədbirə ev sahibliyi etmişdi. İndi isə şəhərlərin gələcəyi, dayanıqlı inkişaf və müasir urbanizasiya məsələlərinin müzakirə olunduğu ən nüfuzlu beynəlxalq platformalardan birinin Azərbaycana etibar edilməsi təsadüfi görünmür”.

Bu barədə Bizimyol.info xəbər portalına Milli Məclisin deputatı Elnarə Akimova danışıb.

O qeyd edib ki, müasir dünyada dövlətlərin nüfuzu yalnız iqtisadi göstəricilər və ya coğrafi mövqe ilə müəyyən edilmir. Ölkənin böyük tədbirləri qəbul etmək, minlərlə iştirakçını eyni anda idarə etmək, təhlükəsizlik, logistika, təşkilatçılıq və beynəlxalq əməkdaşlıq imkanları artıq dövlətlərin etibar göstəricilərindən birinə çevrilib. Azərbaycan son illərdə bu istiqamətdə formalaşdırdığı təcrübəni ardıcıl şəkildə nümayiş etdirir.

“Sözügedən forumun Bakıda keçirilməsi həm də yeni siyasi və iqtisadi imkanlar deməkdir. Belə tədbirlər zamanı dövlət rəhbərləri, nazirlər, beynəlxalq təşkilatların nümayəndələri, ekspertlər və biznes dairələri arasında qurulan münasibətlər sonradan real əməkdaşlıq layihələrinə çevrilə bilir. Bu platformalarda yalnız çıxışlar edilmir — gələcəyin tərəfdaşlıqları qurulur, yeni ideyalar formalaşır, investisiya və inkişaf istiqamətləri müəyyən olunur”-deyən deputat bildirib ki, Azərbaycan üçün bu forumun daha bir mühüm nəticəsi ölkənin beynəlxalq imicinin güclənməsi ilə bağlıdır. Dünyanın diqqətinin müəyyən müddət ərzində Bakıya yönəlməsi ölkənin müasir infrastrukturu, təşkilatçılıq qabiliyyəti və açıq əməkdaşlıq mühiti haqqında yeni təsəvvür yaradır. Bu gün qlobal tədbirlər keçirmək sadəcə protokol məsələsi deyil — bu, ölkənin özünü dünyaya necə təqdim etməsidir.

• “Təbii olaraq sual yaranır: bu uğur gələcək beynəlxalq tədbirlərə yol aça bilərmi?

Məntiqli cavab budur ki, bəli — belə potensial mövcuddur. Beynəlxalq praktikada böyük tədbirləri uğurla keçirən ölkələr sonrakı illərdə daha iri miqyaslı forumlara, sammitlərə, iqtisadi və humanitar platformalara ev sahibliyi etmək üçün daha çox etimad qazanırlar. Bu, uzunmüddətli prosesdir və burada əsas amil yalnız tədbiri keçirmək deyil, onun nəticələrini davamlı əməkdaşlığa çevirmək bacarığıdır.

Azərbaycan son dövrdə formalaşdırdığı təcrübə ilə göstərir ki, qlobal gündəmdə iştirak etmək niyyətində olan deyil, artıq həmin gündəmin formalaşdığı məkanlardan birinə çevrilmək istəyən ölkə modelini seçib. WUF13 və COP29 kimi tədbirlər bu baxımdan yalnız hadisə deyil — gələcək imkanların başlanğıcı kimi dəyərləndirilə bilər”-deyə deputat bildirib.

Onun fikrincə, çünki müasir dünyada diqqət mərkəzində olmaq təsadüf deyil. Bu, etimadın, hazırlığın və beynəlxalq məsuliyyətin nəticəsidir. Azərbaycan isə son illərdə məhz bu imici formalaşdırmağa çalışdığını nümayiş etdirir.

İradə Cəlil,Bizimyol.info