Hantavirusun yayıldığı sərnişin gəmisinin Tenerifeyə yaxınlaşması fonunda müxtəlif ölkələr 140-dan çox sərnişin və ekipaj üzvünün qəbuluna hazırlaşır.
Bizimyol.info xəbər verir ki, gəminin bazar günü səhər saatlarında adaya çatacağı gözlənilir.
İndiyədək azı üç nəfərin öldüyü, bir neçə şəxsin isə yoluxduğu bildirilir. Mütəxəssislərin məlumatına görə, hantavirus adətən gəmiricilərin ifrazatlarının toz hissəciklərinin nəfəs yolu ilə orqanizmə daxil olması nəticəsində yayılır və insanlar arasında yoluxma riski aşağıdır. Lakin bəzi alimlər gəmidə qeydə alınan "Andes" virusunun nadir hallarda insandan insana keçə biləcəyini istisna etmirlər.
Argentina rəsmiləri ehtimal edirlər ki, virus ilkin olaraq səfərində olan hollandiyalı bir cütlükdə yaranıb. Onlar aprelin 1-də Argentinadən yola çıxaraq gəmidə səyahətə qoşulublar. Lakin yoluxmanın dəqiq mənbəyi hələ təsdiqlənməyib.
Argentina Səhiyyə Nazirliyi araşdırmaları ölkənin cənubundakı Uşuiya şəhəri ətrafında cəmləyib və yaxın günlərdə bölgəyə mütəxəssislər göndərməyi planlaşdırır.
İspaniya hakimiyyəti sərnişinlərin Tenerifedə qəbuluna hazırlıq görür. Bildirilib ki, insanlar yalnız repatriasiya uçuşları hazır olduqdan sonra kiçik qayıqlarla sahilə çıxarılacaq və avtobuslarla hava limanına aparılacaqlar.
ABŞ və Böyük Britaniya öz vətəndaşlarını təxliyə etmək üçün təyyarələr göndərəcək. ABŞ vətəndaşlarının daha sonra Nebraska ştatında yerləşən xüsusi karantin və biotəhlükəsizlik mərkəzinə aparılacağı bildirilir.
Digər ölkələr isə hələlik öz planlarını açıqlamayıb və sərnişinlərin nə qədər müddət gözləməli olacağı məlum deyil.
Gəmi operatoru "Oceanwide Expeditions" və Niderland rəsmilərinin məlumatına görə, aprelin 24-də 12-dən çox ölkədən olan 20-dən artıq sərnişin Cənubi Atlantikdə yerləşən Saint Helena adasında gəmini tərk edib.
Onların arasında həyat yoldaşının cəsədi ilə birlikdə düşən hollandiyalı qadın da olub. Sonradan həmin qadının özü də vəfat edib. İlk ölüm hadisəsindən sonra yalnız mayın 2-də gəmidə hantavirus təsdiqlənib.
Bu gecikmə səbəbindən bir çox ölkə həmin sərnişinlərin harada olduğunu müəyyən etməyə çalışır.
Gəmini tərk edən sərnişinlərin bir hissəsi müxtəlif ölkələrə səfər edib. Məsələn, vəfat edən hollandiyalı qadın əvvəlcə Johannesburga uçub, daha sonra Amsterdama getməyə hazırlaşan reysdən səhhəti pisləşdiyi üçün çıxarılıb və daha sonra həyatını itirib.
Niderland rəsmiləri onunla təmasda olmuş şəxsləri izləyir. Təmasda olan bir ekipaj üzvü simptomlar göstərsə də, test nəticəsi mənfi olub.
Bəzi ölkələr öz vətəndaşlarının vəziyyətini müəyyən etsə də, onların sonrakı təmasları barədə tam məlumat yoxdur. ABŞ-da isə evlərinə qayıtmış az sayda sərnişin müşahidə altındadır və onlarda hələlik simptom aşkarlanmayıb.
Bizimyol.info
