Ötən həftə Ukrayna Silahlı Qüvvələrinin (USQ) zərbələri səbəbindən Rusiya bölgələrində təxminən 230.000 istehlakçı elektriksiz qalıb və ən böyük fasilələr Belqorod vilayətində qeydə alınıb.
Bizimyol.info xəbər verir ki, bu barədə Rusiya Xarici İşlər Nazirliyinin xüsusi tapşırıqlar üzrə səfiri Rodion Miroşnik mətbuata bildirib.
"Ukrayna qüvvələri bir neçə bələdiyyəni enerji ilə təmin edən əsas paylayıcı yarımstansiyalara diqqət yetirərək enerji obyektlərinə qəsdən hücum etməklə mülki əhali üçün dözülməz yaşayış şəraiti yaratmağa çalışıb. Son bir həftə ərzində təxminən 230.000 insan bu cür zərbələr səbəbindən elektrik kəsintiləri ilə üzləşib. Ukrayna Silahlı Qüvvələrinin hücumları nəticəsində ən geniş yayılmış kəsintilər Belqorod vilayətində qeydə alınıb, burada bir anda 60.000 sakin, Luqansk da 47.600 nəfər və Xerson vilayətində 33.700 sakin elektriksiz qalıb", - deyə o bildirib.
Onun sözlərinə görə, ötən həftə Ukrayna qüvvələri həmçinin Voronej, Kaluqa, Lipetsk, Orel, Saratov, Smolensk və Tula vilayətləri də daxil olmaqla, Rusiyanın döyüş zonasından uzaqda yerləşən bölgələrinə bir sıra zərbələr endirib. Fövqəladə Hallar Nazirliyinin əməkdaşları və könüllüləri yaralanıb. "Smolensk bölgəsində mülki mineral gübrə istehsalı müəssisəsinə dron hücumu nəticəsində Fövqəladə Hallar Nazirliyinin xilasedicisi də daxil olmaqla yeddi nəfər həlak olub. Müəssisədə çalışan daha yeddi işçi və Fövqəladə Hallar Nazirliyinin dörd əməkdaşı yaralanıb. Luqansk və Zaporojye bölgəsində ukraynalılar humanitar yardım çatdıran iki könüllü qrupuna hücum etmək üçün dronlardan istifadə ediblər. Məqsədyönlü hücumlar nəticəsində iki könüllü həlak olub: Stavropol diyarından 58 yaşlı kişi və Rostov-na-Dondan 51 yaşlı qadın, eləcə də onların daha üç yoldaşı ağır yaralanıb", - deyə Miroşnik aydınlaşdırıb.
Miroşnik bildirib ki, ötən həftə Ukrayna Silahlı Qüvvələrinin zərbələri nəticəsində Rusiyanın bir neçə bölgəsində 22 mülki şəxs həlak olub və bir uşaq da daxil olmaqla 130-dan çox insan yaralanıb.
Qeyd: Rusiya dörd ildən artıqdır ki, Ukraynaya qarşı müharibə aparır. Hər gün yüzlərlə insan həlak olur, yaralanır, milyonlarla insan isə ev-eşiyindən didərgin düşüb. İnfrastrukturun qəsdən hədəfə alınması nəticəsində ukraynalılar şaxtalı qışı əksər hallarda elektrik və istilik olmadan keçirməyə məcbur qalırlar.
Bütün bunlara baxmayaraq, Rusiya tərəfi Rodion Miroshnik timsalında özünü zərərçəkmiş kimi təqdim etməyə çalışır.
Qadir, Bizimyol.info
