Səhiyyə mütəxəssisləri xəbərdarlıq edirlər ki, qəlyan çəkmək infeksiyaların, o cümlədən vərəmin ötürülmə yolu ola bilər. Risklər təkcə tüstü və ya nikotinlə deyil, həm də bir neçə nəfər tərəfindən istifadə olunan və çirklənmiş avadanlıqla təmas nəticəsində yaranır.

Bizimyol.info xəbər verir ki, bu məlumatlar Research Safety nəşrində dərc olunub.

Vərəm "Mycobacterium tuberculosis" (Kox çöpləri) adlı bakteriyanın törətdiyi yoluxucu xəstəlikdir. Xəstə əsasən öskürərkən və ya asqırarkən hava-damcı yolu ilə ötürülür, lakin bu bakteriyalar ətraf mühitdə və müxtəlif səthlərdə uzun müddət yaşamaq qabiliyyətinə malikdir. Araşdırmalara görə, vərəm mikobakteriyaları quru səthlərdə həftələrlə, hətta aylarla virulentliyini itirmədən qala bilir.

Qəlyan çəkərkən yoluxma riski borunun, şlanqın və cihazın digər hissələrinin birgə istifadəsi səbəbindən artır. Hətta yuyulma və dezinfeksiya olunsa belə, bakteriyaların səthdə qalma ehtimalı yüksək olaraq qalır. Çünki bu mikroorqanizmlər xarici mühitə davamlıdır və tənəffüs yollarının selikli qişası şlanq və ağızlıqdan keçən hava ilə birbaşa təmasda olur.

Həkimlər vurğulayırlar ki, birdəfəlik ağızlıqlar da riski tam aradan qaldırmır. Çünki infeksiya yalnız ucluqda deyil, qəlyanın bütün daxili sistemində mövcud ola bilər.

Qeyd olunur ki, vərəm uzunmüddətli və çox vaxt mürəkkəb müalicə tələb edir, ağırlaşmalar — o cümlədən cərrahi müdaxilə ehtiyacı — yarada bilər və bəzi hallarda geri dönməz nəticələrə və ya ölümə səbəb olur.

Bu səbəbdən mütəxəssislər qəlyanın birgə istifadəsindən çəkinməyi, gigiyenaya ciddi riayət etməyi və xüsusilə tez-tez ictimai məkanlarda və ümumi avadanlıqlarla təmasda olan şəxslərə vərəm üzrə müntəzəm müayinələrdən keçməyi tövsiyə edirlər.

Qadir, Bizimyol.info