Prezident Ersin Tatar ABŞ Anadolu İş Adamları Dərnəyinin (ASKON) “New York Chart House”da təşkil etdiyi “Amerika Türk İş Dünyası Toplantısı”na qatılıb.
Bizimyol.info xəbər verir ki, Şimali Kipr Türk Cümhuriyyəti (ŞKTC) Prezident Administrasiyasından verilən məlumata görə, amerikalı və türkiyəli iş adamlarını bir araya gətirən tədbirdə Türkiyə Respublikasının ticarət naziri Ömər Bolat, sənaye və texnologiya naziri Mehmet Fatih Kacır və maliyyə naziri Mehmet Şimşək də iştirak ediblər.
Prezidentlikdən verilən açıqlamaya görə, tədbirdə çıxış edən Tatar: “Bu gün sizinlə olmaqdan çox məmnunam, məndən əvvəl çıxış edən nazirləri dinlədikdən sonra böyük qürur hissi ilə görürəm ki, Türkiyə etibarlı əllərdədir və pandemiyanın, dağıdıcı zəlzələ, eləcə də qida zəncirində problemlər yaradan digər ölkələrlə münaqişələrin mənfi təsirlərindən sonra iqtisadi artımını davam etdirəcək”, - deyib.
Prezident Tatar: “Bir iqtisadçı kimi deyə bilərəm ki, statistik məlumatlarla iqtisadiyyatın istiqamətini proqnozlaşdıra bilmək həqiqətən investisiyaların və biznesin cəlb edilməsi, məhsuldarlığın artırılması və sağlam rəqabətin təşviqi üçün vacibdir”, - deyə qeyd edib.
Dünyanın digər ölkələri ilə iş və ticarətdə rəqabət aparmağın vacibliyinə diqqət çəkən Prezident Tatar, Türkiyənin Ukrayna-Rusiya müharibəsinin başlamasından sonra ortaya çıxan ərzaq böhranı ilə mübarizədə beynəlxalq səylərə rəhbərlik edən regional güc olduğunu bildirib. Prezident Tatar qeyd edib ki, prezident Ərdoğan çıxışı zamanı federal əsaslı danışıqların tamamilə etibarını itirdiyini vurğulayıb.
Prezident Tatar: “Yadınızdadırsa, yarım əsrdən çoxdur ki, Kiprdə federal əsaslı danışıqlar aparılır. Kipr türk tərəfinin gərgin səylərinə və 2004-cü ilin aprelində eyni vaxtda keçirilən ayrı-ayrı referendumlarda BMT-nin həll planını dəstəkləməsinə baxmayaraq, federal həlli rədd edən Rum xalqı oldu. Tam əsasda aparılan son və yekun danışıqlar 2017-ci ilin iyulunda Krans-Montanada yenə uğursuzluğa düçar oldu. Bütün bunlar onu göstərir ki, Kipr Türk xalqı ilə bərabərlik əsasında güc və rifahı bölüşməkdən imtina edən məhz Kipr Rum tərəfidir”, - deyib.
Prezident Tatar, Kipr Rum tərəfinin də Türkiyənin qarant hüquqlarını aradan qaldırmaq üçün “sıfır əsgər, sıfır zəmanət” kimi tələblər irəli sürdüyünü bildirib: “Bu il Kiprin Yunanıstanla birləşdirilməsi ambisiyalarının bir hissəsi olaraq Yunan-Kipr ikilisinin bizə qarşı törətdiyi vəhşiliklərdən sonra Kipr türk xalqını xilas edən Kipr Sülh Əməliyyatının 50-ci ildönümünü qeyd edirik. Türkiyə bizi xilas etdi, axan qanı dayandırdı və iki dövlət olaraq özlərini ayrı idarə edən Kipr Türk xalqına və Rum xalqına sülh gətirdi. Kipr adasındakı reallıq budur. Federal zəmində aparılan danışıqlar bir həll gətirmədi. Bu səbəblə deyirik ki, federal həlldən kənarda düşünmək və Kiprdə iki dövlət arasında yaxşı qonşuluq və əməkdaşlığa əsaslanan real və davamlı həll yolu tapmağa ehtiyac var”, - deyə qeyd edib.
Qadir, Bizimyol.info
