Şimali Kipr Türk Respublikasının (ŞKTC) Prezident Ersin Tatar, Londondakı təmasları çərçivəsində Böyük Britaniya Parlamentinin ŞKTC Dostluq Qrupu üzvlərinin təşkil etdiyi dəyirmi masa toplantısına qatılıb.
Prezidentlikdən verilən açıqlamaya görə, bir saat davam edən görüşdə Lord Hüseyn, Baronessa Sarah Ludford, Lord Kamall, millət vəkili Nesil Çalışkan və millət vəkili Tahir Əli iştirak edib. Görüşdə ŞKTC London təmsilçisi Çimen Keskin, Prezidentin xüsusi nümayəndəsi Günəş Onar və xarici mətbuat katibi Kerem Haser də iştirak edib.
Prezident Tatar çıxışında Nesil Çalışkanı İngiltərədə millət vəkili seçilən ilk kiprli türk olması münasibətilə təbrik edib və ona uğurlar arzulayıb. Tatar, hətta bir çox beynəlxalq platformalarda səsini eşitməkdən belə məhrum olan Kipr Türk xalqının vəziyyətini və ədalətsizliyini ortaya qoyan lobbiçilik fəaliyyətlərinə görə Böyük Britaniya Parlamentinin ŞKTC Dostluq Qrupu üzvlərinə təşəkkür edib.
Tatar həmçinin bildirib ki, Kipr adasının Şərqi Aralıq dənizində, Türkiyənin cənub sahillərindən 40 mil, Yunanıstandan isə təqribən 700 mil məsafədə yerləşdiyi üçün geostrateji əhəmiyyəti var.
Kipr türk xalqının yarım əsrdən artıqdır ki, bərabərlik əsasında federal həllə nail olmağa çalışdığını ifadə edən Prezident Tatar, Yunanıstanın keçmiş xarici işlər naziri Nikos Rolandis ən azı 15 həll planını rədd edən tərəfin Kipr Rum tərəfi olduğunu açıq şəkildə ifadə etdiyini qeyd edib. Kipr türk xalqının təcrid olunmağa və əsas insan hüquqlarından məhrum olmağa davam etdiyini bildirən Tatar, 2004-cü ildə Annan Planı dövründə təcridin aradan qaldırılması üçün beynəlxalq ictimaiyyətin bir çox öhdəliklər götürdüyünü, lakin bu təcrid və məhdudiyyətlərin aradan qaldırılması ilə bağlı verilən vədlərin yerinə yetirilmədiyini söyləyib.
“Əgər uzunmüddətli və davamlı həll istəyiriksə, Kiprdəki mövcud vəziyyətin reallıqlarına diqqət yetirmək lazımdır. Federal həllər çərçivəsindən kənarda düşünməyin vaxtı gəldiyini bildiririk. Kiprdə iki dövlət var. Kipr türkləri və yunanlar, onlar yaxşı qonşuluq münasibətlərinə və hər iki tərəfə fayda verəcək əməkdaşlıq münasibətlərinə malik ola bilərlər. Belə bir həll həm də təbii sərvətlər və enerji sahəsində əməkdaşlığı mümkün edəcək və Rum tərəfi də bundan faydalanacaq”, - deyə prezident qeyd edib.
Tatar Böyük Britaniyanın qarant dövlət kimi Kiprdə hər iki tərəfə bərabər davranmasının vacibliyini vurğulayıb: “Yeni seçilmiş İşçi Partiyası Hökuməti Kipr türk xalqına tətbiq edilən qeyri-insani təcrid və birbaşa uçuşlar, eləcə də birbaşa ticarətə imkan verməklə bu ədalətsiz məhdudiyyətlərə son qoyulması zərurətinə yeni perspektiv gətirə bilər”, - deyib.
İclasda çıxış edən Lord Hüseyn Kipr türk xalqının hüquqlarının, o cümlədən öz müqəddəratını təyinetmə hüququnun qəti tərəfdarı olduğunu bildirib.
Baronessa Sarah Ludford Avropa Parlamentinin deputatı olarkən Ercan hava limanı vasitəsilə adaya səfər etdiyini və təcridin təsirlərini öz gözləri ilə gördüyünü bildirib. Ludford həmçinin bildirib ki, o, təcridin dayandırılması və Kiprdə hərtərəfli həll yollarının tapılması zərurətini dəstəkləyir.
Nesil Çalışkan, prezident Tatara TBMM-i ziyarət etdiyi üçün təşəkkür edib və İngiltərənin Kipr adası ilə tarixi əlaqələri olduğuna diqqət çəkib. Çalışkan Kiprdə həll olunmamış bir vəziyyətin olduğunu və problemin siyasi həllinin tapılması lazım olduğunu bildirib.
