Yer üzündə əvvəllər bir çox super qitələr yaranıb. Beləliklə, gələcəkdə bütün qitələrin yenidən birləşərək vahid quruya çevrilməsi ehtimalı varmı?

Bizimyol.info "webtekno"ya istinadən xəbər verir ki, dünya mövcud olduğu vaxtdan dəfələrlə super qitələrin yaranmasının şahidi olub.

Pangea bu super qitələrin ən məşhur nümunəsi ola bilər, lakin geoloji tarix boyu bir çox oxşar birləşmələr meydana gəlmişdir.

2012-ci ildə Banqor Universitetinin tədqiqatçıları Yerin gələcək super qitəsinin necə görünə biləcəyi ilə bağlı dörd fərqli ssenari hazırlayıblar.

Bu ssenarilərin adları bunlardır: Novopangea, Pangea Ultima, Aurica və Amasiya. Amma hansı ssenarinin baş verəcəyi kimdən soruşmağınızdan asılıdır.

Novopangea ssenarisi Atlantik Okeanının genişlənməyə davam etməsinə və Sakit Okeanın daralmasına əsaslanır. Bu ssenaridə Amerika qitələri Antarktidaya doğru sürüklənəcək, Afrika və Avrasiya Amerikaya qoşularaq nəhəng quru kütləsini meydana gətirəcək.

Yeni Şotlandiyadakı St. Francis Xavier Universitetindən Brendan Merfi bildirir ki, bu proses qitələrin necə birləşəcəyinə dair mühüm ipucu verir. Mörfinin fikrincə, super qitələrin yaranması planetin təkamülünə və həyatın inkişafına böyük təsir göstərir.

Başqa bir ssenari, Yale Universitetindən Ross Mitchell tərəfindən dəstəklənən Amasiya nəzəriyyəsidir

Bu nəzəriyyəyə görə, Amerika qitələri, Afrika və Avrasiya şimala doğru hərəkət edərək Şimal qütbündə görüşəcək. Bu ssenaridə Şimal Buzlu Okeanı tamamilə yox olacaq və Antarktida planetin digər ucunda təcrid olunmuş vəziyyətdə qalacaq.

Merfi Amasiya ssenarisinin də tamamilə mümkün olduğunu bildirir. Lakin hansı ssenarinin baş verəcəyini hələlik dəqiq söyləmək mümkün deyil.

Bəs super qitə tam olaraq nə vaxt formalaşacaq və biz onu görə biləcəyik?

Alimlərin razılaşdıqları bir məqam var: Əgər gələcəkdə super qitə yaranarsa, bu, təxminən 250 milyon ildən sonra baş verəcək. Bu müddət ərzində qitələrin hərəkəti və Yerdəki yaşayış şəraiti çox dəyişə bilər.

Yale Universitetindən Mitchell bildirir ki, bu proses baş verənə qədər insanlar çox güman ki, yox olacaqlar. Bununla belə, bu ssenarilər üzrə araşdırmalar Yerdəki təkamülü və qitələrin gələcəkdə necə bir araya gələcəyini anlamağa kömək edir.