Türkiyə lideri Rəcəb Tayyib Ərdoğanın Türkiyənin İsrailə girə biləcəyi ilə bağlı bəyanatı regional və beynəlxalq nəticələrə səbəb olacaq, lakin bu variant praktiki olaraq real deyil.

Bizimyol.info xəbər verir ki, bu fikri beynəlxalq təhlükəsizlik məsələləri üzrə türkiyəli aparıcı ekspert, Ankara Qlobal Məsləhət Qrupunun rəhbəri Hüseyn Bağçı deyib.

“Türkiyə prezidentinin bəyanatının şübhəsiz ki, regional və beynəlxalq nəticələri olacaq. Eyni zamanda, Türkiyənin Liviya və ya Qarabağ nümunəsi ilə Qəzzaya təkbaşına müdaxilə etməsi demək olar ki, mümkünsüz görünür. Bu, NATO, ABŞ, Rusiya və Çinin maraqlarına cavab verməyəcək. Fələstin probleminin həlli qlobal güclərin və ərəb dünyası ölkələrinin dəstəyi ilə tapıla bilər. Bu, Türkiyə üçün milli məsələ deyil, ərəb dünyasında illərdir davam edən problemdir”, - deyə ekspert Rusiya mətbuatına bildirib.

Eyni zamanda o, Ərdoğanın Qara dənizin Rize vilayətində partiya fəalları ilə görüşündə verdiyi açıqlamaların ilk növbədə daxili ictimaiyyətə yönəldiyini istisna etməyib.

İyulun 28-də Ərdoğan deyib ki, Türkiyə bir vaxtlar Qarabağ və Liviyaya girdiyi kimi İsrailə də “girə” bilər. Bunun üçün güclü olmaq lazımdır deyib. Ərdoğanın İsrailə qarşı yeni sərt bəyanatı iyulun 28-də yerli telekanallar tərəfindən yayımlanıb. Lakin o, “İsrailə girin” ifadəsi ilə nəyi nəzərdə tutduğunu təfərrüatlı açıqlamayıb.

İsrailin xarici işlər naziri İsrael Katz Ərdoğanın açıqlamalarına cavab olaraq 1979-2003-cü illərdə İraqa rəhbərlik etmiş və 2006-cı ildə edam edilən Səddam Hüseynin taleyini təkrarlaya biləcəyini bildirib.

Türkiyə Xarici İşlər Nazirliyi isə “soyqırım Netanyahunun sonu Hitlerinki kimi olacaq” deyə cavab verib.

İsrail və Türkiyə arasında münasibətlər 2023-cü ilin oktyabrında başlayan Fələstin-İsrail münaqişəsinin kəskinləşməsindən sonra kəskin şəkildə pisləşib. Tərəflər dəfələrlə sərt bəyanatlar verib, qarşılıqlı ittihamlar səsləndiriblər. 2023-cü il oktyabrın sonunda İsrail Xarici İşlər Nazirliyi “İsrail-Türkiyə münasibətlərini yenidən qiymətləndirmək üçün” Ankaradan diplomatların geri çağırıldığını elan edib. Türkiyə də məsləhətləşmələr üçün Təl-Əvivdəki səfirini geri çağırıb.

Qadir, Bizimyol.info