Türkiyə Təhlükəsizlik Şurasının nümayəndəsi Türkiyədə keçirilən seçkilərdən sonra Ərdoğanla Əsəd arasında görüş keçiriləcəyini istisna etməyib.

Bizimyol.info xəbər verir ki, Türkiyə Prezidenti yanında Təhlükəsizlik və Xarici Siyasət Şurasının üzvü Çağri Erhan RİA Novosti-yə  açıqlaması zamanı bildirib ki, Türkiyədə keçiriləcək prezident seçkiləri öncəsi Türkiyə və Suriya prezidentləri Rəcəb Tayyib Ərdoğan və Bəşər Əsəd arasında görüş ehtimalı azdır.

"Prezident Ərdoğan prinsip etibarilə belə bir görüşün əleyhinə deyil, lakin dağıdıcı zəlzələlər hər şeyi dəyişdi. Prezidentin bütün cədvəli dəyişdirildi - o, həftənin üç gününü fəlakət zonasında keçirir. Başlanğıc görüşünə 74 gündən az vaxt qalıb. Seçkilər olduğu üçün Əsədlə şəkil çəkdirməyə belə getməyin bir yolunu tapmaq mümkün olacağını düşünmürəm. Ola bilsin ki, görüş seçkilərdən sonra baş tutsun”, - deyə Erhan bildirib.

Məlumat üçün bildirək ki, Türkiyədə prezident seçkiləri, Ərdoğanın daha əvvəl dediyi kimi, mayın 14-də keçiriləcək. Prezidentin bununla bağlı martın 10-da sərəncam imzalayacağı gözlənilir.

Onu da əlavə edək ki, Ərdoğan bir müddət əvvəl Rusiya prezidenti Vladimir Putinə Türkiyə, Rusiya və Suriya liderlərinin görüşünün keçirilməsini təklif etdiyini, lakin ondan əvvəl kəşfiyyat xidmətləri, Müdafiə Nazirliyi və Xarici İşlər nazirliklərinin rəhbərlərinin görüşünün keçirilməli olduğunu bildirib.

Dekabr ayında isə Rusiya Türkiyə və Suriya müdafiə nazirləri arasında son 11 ildə ilk danışıqlara ev sahibliyi edib.

Xatırladaq ki, 2011-ci ildə Suriyada vətəndaş müharibəsi başlayıb. O vaxtdan bəri Türkiyənin Suriya ilə münasibətləri çətin olaraq qalır. Lakin son həftələr hər iki tərəf, eləcə də bəzi KİV-lər tədricən normallaşmanın mümkünlüyündən danışırlar.

Qeyd edək ki, Ankara və Dəməşq arasındakı fikir ayrılıqlarını həll etmək üçün Rusiya Federasiyası, Suriya və Türkiyə XİN rəhbərlərinin görüşü planlaşdırılır.

Leyla Mirzə