Ermənistan-Türkiyə nizamlanmasında irəliləyiş yalnız İrəvanla Bakı arasında sülh sazişinin imzalanmasından sonra mümkündür.

Bizimyol.info xəbər verir ki, bu barədə parlamentdə keçirdiyi brifinqdə “Hayastan” fraksiyasının deputatı Gekham Manukyan bildirib.

Onun sözlərinə görə, Ermənistanla Türkiyə arasında real barışıq prosesi yoxdur, Türkiyə tərəfi az mənalı jestlər edir, erməni tərəfi isə sırf daxili auditoriya üçün aktiv fəaliyyət görüntüsü yaradır.

"İctimaiyyəti aldadırlar (Ermənistan hakimiyyəti - red.). Anidəki körpünün təmirinin nailiyyət olduğunu bildirirlər. Baş verənlərin hamısı “qablaşdırılan”, təqdim olunan saxtakarlıqdır”, - deyə o, bildirib.

Müxalifətçi xatırladıb ki, Ani körpüsünün təmiri ilə bağlı ilk söz hələ 2017-ci ildə Türkiyə mətbuatında çıxıb. Üstəlik, 2019-cu ildə internetin erməni seqmentində bir neçə gündür yazılan və danışılan körpünün eskizləri yaradılıb. Bu kontekstdə Manukyan qeyd edib ki, Ermənistan tərəfi də hətta 44 günlük müharibədən əvvəl Türkiyə ilə münasibətləri normallaşdırmağa hazırlaşır.

Onun sözlərinə görə, xüsusilə, 2020-ci il iyunun 25-də Ermənistan hökuməti M3 avtomobil yolunun (Türkiyə-Marqara-Vanadzor-Təşir-Gürcüstan sərhədi) və M1 avtomobil yolunun (Talın-Karakert) tikintisinə təqribən 2 milyard dram (5 milyon dollar) ayrılması barədə qərar qəbul edib.

"Məhz o zaman Türkiyə ilə Ermənistanın Ukraynadakı hazırkı səfiri Vladimir Karapetyanın apardığı güman edilən kölgə danışıqlarından danışdılar. Və o vaxtkı xarici işlər naziri Ara Ayvazyan Türkiyə ilə Ermənistan arasında dialoqu təkzib etmədi”, - deyə siyasətçi bildirib.

Parlamentari hesab edir ki, Türkiyə Azərbaycanla sülh müqaviləsi imzalanana qədər sərhədi açmayacaq və İrəvana təzyiqlərini davam etdirəcək.

“Üstəlik, Türkiyə tərəfi əvvəllər olduğu kimi, ilkin şərtlər irəli sürür, Ermənistanın isə heç bir şərti yoxdur.

Ankara beynəlxalq ictimaiyyətin gözünə toz tökmək üçün ancaq sülhsevər qonşu obrazı yaradır. İşlər Türkiyə tərəfinin bəyanatlarından uzağa getməyəcək.

Ermənistan-Türkiyə və Ermənistan-Azərbaycan barışığı prosesləri paralel gedir. Maraqlıdır ki, baş nazir Nikol Paşinyan sülh sazişinin mətninin Bakıya xarici işlər naziri Ararat Mirzoyan Türkiyədə olduğu gün göndərildiyini açıqlayıb. Mümkündür ki, bu, Türkiyə vasitəsilə edilib”, - deyə Qeqam Manukyan bildirib və əlavə edib ki, o, artıq müvafiq deputat sorğusu göndərib.

Xatırladaq ki, fevralın 15-də Ankarada Ermənistan və Türkiyənin xarici işlər nazirləri - Ararat Mirzoyan və Mövlud Çavuşoğlu arasında danışıqlar olub. Daha sonra nazirlər münasibətləri normallaşdırmağa hazır olduqları barədə bir sıra əsas bəyanatlarla çıxış ediblər.

Bu, Mirzoyanın son bir ildə Türkiyəyə ikinci səfəridir. 2022-ci ilin martında o, Antalyada diplomatik forumda iştirak edib və burada Çavuşoğlu ilə də danışıqlar aparıb.

Qeyd edək ki, Türkiyə ilə Ermənistan arasında diplomatik əlaqələr yoxdur, iki ölkə arasında sərhəd 1993-cü ildən Ankaranın təşəbbüsü ilə bağlıdır.

Leyla Mirzə, Bizimyol.info