Prezident Rəcəb Tayyib Ərdoğan həyat yoldaşı Əminə Ərdoğanla birlikdə mərkəz Kahramanmaraş zəlzələdən zərər çəkmiş vilayətlərə səfəri çərçivəsində Diyarbəkir və Şanlıurfaya gəlib.

Bizimyol.info xəbər verir ki, Prezident Ərdoğan Diyarbəkir səfərindən sonra gəldiyi Şanlıurfada açıqlamalar verib.

"Sizi ən səmimi hisslərimlə salamlayıram. İlk olaraq sizin simanızda bütün Şanlıurfalı qardaşlarıma tez sağalın demək istəyirəm. Biz xalq olaraq tariximizin ən böyük fəlakətlərindən birini yaşadıq. Təəssüf ki, 2 zəlzələ 10 əyalətdə ciddi dağıntılara və insan tələfatına səbəb olub, - deyə Prezident görüşdüyü zəlzələdən zərər çəkənlərə müraciət edib.

"Verilən olan son məlumatlara görə, indiyədək 21 848 vətəndaşın həyatını itirdiyi zəlzələlərdə 80 104 vətəndaşımız xəsarət alıb. Allah həyatını itirən hər bir qardaşıma rəhmət eləsin, yaxınlarına başsağlığı verirəm. Bu böyük zəlzələ 13,5 milyon vətəndaşımızın yaşadığı 500 kilometrlik əraziyə dağıdıcı təsir göstərdi. Bu, dünyada nadir bir fəlakətdir. Zəlzələ mütəxəssislərini dəhşətə gətirən bu fəlakətin izlərini əyalətlərimizdə də görmək mümkündür. Bunun 1939-cu il Ərzincan və 1999-cu il Mərmərə zəlzələlərindən qat-qat güclü və dağıdıcı olduğu açıq-aydın görünür", - deyə Ərdoğan qeyd edib.

Prezident deyib ki, dövlətimizin bütün qurumlarını səfərbər etmişik: "Biz nazirliklərimizin bütün bölmələrini və bütün təhlükəsizlik qüvvələrimizi bölgəyə yönəltmişik. Bu prosesdə fəlakətin böyüklüyünə və sərt qış şəraitinin gətirdiyi çətinliklərə görə bir çox çətinliklərlə üzləşdik. Təbii ki, bəzi sahələrdə müəyyən gecikmələr, axsamalar olub. Dövlətimizin səmimi mübarizəsini heç kim inkar edə bilməz. Vətəndaşlarımızın mətanətini gördükcə nə qədər böyük xalq olduğumuzu anlayırıq. Biz bu çətin günlərin öhdəsindən gələcəyik. İnanıram ki, Allahın köməyi ilə hər cür bəladan çıxacağıq.

Biz dağıntıların təmizlənməsi və zərərin qiymətləndirilməsi fəaliyyətlərimizi yekunlaşdırıb yenidənqurma və bərpa işlərimizə başlayacağıq. Vanda, Elazığda, Malatyada, İzmirdə zəlzələlər, sellər, yanğınlar, fəlakət bölgələrindəki yaraları necə sarıdıqsa, buralarda da, bu bəlanı o qədər də tez sağaldacağıq. Zəlzələ qurbanlarının mənzil problemini həll etməsi üçün hər cür tədbirləri görürük", - deyə dövlət başçısı bildirib.

"Zəlzələdə evləri dağılan və yaşayış üçün yararsız hala düşən vətəndaşlarımızın sığınacaq ehtiyaclarını istər öz şəhərlərində, istərsə də başqa vilayətlərdə qarşılayırıq. Ölkəmizin hər yerində otellərimizdə, yataqxanalarımızda yerlər ayırmışıq. Müvəqqəti sığınacaq mərkəzlərində 1 milyon 100 min insan var. 5 min lirədən 2 min lirəyə qədər kirayə dəstək proqramı yaratdıq.

Zəlzələdən zərər çəkmiş vətəndaşlarımızın mənzil problemlərini tez həll etmələri üçün hər cür tədbir görürük. Biz nə lazımdırsa, edirik və edəcəyik. Bəzi şəhərlərimizi yenidən quracağıq. İnanırıq ki, bu prosesi qısa müddətdə başa çatdıracağıq, sizdən 1 il vaxt xahiş edirəm",- deyə zərərçəkənlərə səsləndi.

Prezident deyib ki, tariximizin hər dövründə olduğu kimi, biz də birlik, həmrəylik içində hərəkət edərək bunun öhdəsindən gələcəyik.

Qadir, Bizimyol.info