BMT Baş katibi Antonio Quterres şənbə günü Suriyaya səfər edəcək. Bu, 2011-ci ildə başlayan müharibədən sonra vəzifədə olan BMT rəhbərinin ölkəyə ilk səfəri olacaq.

Bizimyol.info xəbər verir ki, Quterres səfər çərçivəsində Suriya prezidenti Əhməd əl-Şaraa, xarici işlər naziri Əsəd əl-Şeybani, hökumət rəsmiləri və vətəndaş cəmiyyəti nümayəndələri ilə görüşəcək.

BMT rəhbəri Suriyanın münaqişədən sonra bərpası, daha sabit və inklüziv gələcəyin qurulması üçün imkanların olduğunu vurğulayacaq.

Quterresin səfəri Suriyada Əsəd hakimiyyətinin devrilməsindən sonra başlayan keçid dövründə həyata keçirilir. Yeni hakimiyyət ölkənin beynəlxalq əlaqələrini bərpa etməyə və iqtisadiyyatı dirçəltməyə çalışır.

Bununla yanaşı, ölkədə dini zəmində baş verən zorakılıqlar beynəlxalq narahatlıq doğurub. Quterres bu hadisələrə görə məsuliyyətin təmin edilməsinə çağırıb.

BMT Baş katibinin Dəməşqdə bir neçə gün qalacağı, daha sonra isə Suriya parlamentində çıxış edəcəyi və BMT sülhməramlı missiyasının fəaliyyət göstərdiyi bölgəyə baş çəkəcəyi gözlənilir.

Bizimyol.info