İngiltərənin səhiyyə sistemi son illərdə ciddi təzyiq altındadır və yeni açıqlanan rəqəmlər vəziyyətin daha da kritikləşdiyini göstərir.
Bizimyol.info xəbər verir ki, Kral Təcili Tibbi Yardım Kolleci (KTTYK) tərəfindən aparılan təhlillərə görə, təcili yardım şöbələrində (A&E) uzun gözləmə müddətləri hər ay 1300-dən çox ölüm ilə əlaqələndirilir.
Məlumatlar göstərir ki, 2025-ci ildə həftəlik olaraq 300-dən çox ölüm uzun gözləmə ilə bağlı qeydə alınıb. Bu rəqəm 2015-ci ildə təxminən 30 idi. Beləliklə, son on ildə bu göstərici demək olar ki, on dəfə artıb. KTTYK-in hesablamaları 5 milyondan çox Səhiyyə Nazirliyinin pasiyentini əhatə edən araşdırmaya əsaslanır və nəticələrə görə, "A&E"də 8–12 saat gözləyən hər 72 xəstədən biri əlavə ölüm riski ilə üzləşir.
Təhlillərə əsasən, 2025-ci ildə uzun gözləmələrlə əlaqəli “artıq ölüm” sayı təxminən 15 860 olub. Bu rəqəm əvvəlki illə müqayisədə bir qədər azalsa da, 2015-ci illə müqayisədə kəskin artımı əks etdirir.
Mütəxəssislər bildirirlər ki, problemin əsas səbəbi xəstəxanalarda yataq çatışmazlığı, təcili yardım şöbələrinin həddindən artıq yüklənməsi və sosial qayğı sistemindəki boşluqlardır. Nəticədə xəstələr vaxtında müalicə ala bilmir və bu, kritik hallarda ölüm riskini artırır.
Tibb işçiləri vəziyyəti “sistem böhranı” kimi qiymətləndirir və bildirirlər ki, hazırkı model yalnız statistik göstəriciləri yaxşılaşdırmağa yönəlib, real problemi həll etmir. Onların fikrincə, uzunmüddətli həll üçün xəstəxana çarpayılarının artırılması, ilkin səhiyyə xidmətlərinin gücləndirilməsi və sosial qayğı sisteminə investisiya vacibdir.
Böyük Britaniya Səhiyyə Nazirliyi isə vəziyyəti “qəbuledilməz” adlandırsa da, "A&E" gözləmə müddətlərinin son beş ilin ən aşağı səviyyəsində olduğunu bildirir. Eyni zamanda, hökumət 40 yeni təcili yardım və "urgent care" (təcili, amma həyati təhlükə olmayan tibbi yardım xidməti) mərkəzinin yaradılmasına 215 milyon funtdan çox vəsait ayrıldığını açıqlayıb.
Bununla belə, ekspertlərin xəbərdarlığı aydındır: struktur problemlər həll olunmadıqca, təcili yardım şöbələrində gərginlik və qarşısı alına bilən ölüm halları davam edəcək.
Qadir, Bizimyol.info
