Amerikanın biotexnologiya startapı Colossal Biosciences, daha əvvəl “dəhşətli canavarlar”ın yenidən yaradılması layihələri ilə gündəmə gəlmişdi və indi nəsli kəsilmiş mavi antilopu diriltməyi planlaşdırır.

Bizimyol.info xəbər verir ki, CNN telekanalının məlumatına görə, bu layihə şirkətin itirilmiş bioloji növlərin “bərpası” sahəsində növbəti addımı olacaq.

Mavi antiloplar müasir Cənubi Afrika ərazisində yaşayıb və təxminən 1800-cü ildən etibarən tamamilə yoxa çıxmış hesab olunur. Heyvan adını tüklərinin qeyri-adi mavi çalarına görə alıb. Dünyada bu növün yalnız dörd taksidermi nümunəsi qalıb və onlar İsveç, Fransa, Avstriya və Hollandiyadakı təbiət tarixi muzeylərində saxlanılır. Bu nümunələr tədqiqatçılar üçün əsas genetik material mənbəyi olacaq.

Növlərin bərpası prosesi genom redaktə texnologiyalarının istifadəsini əhatə edir. "Colossal Biosciences" mütəxəssisləri qorunan qalıqlardan DNT-ni ardıcıllaşdırmağı və antilopun ən yaxın canlı qohumlarından surroqat daşıyıcı kimi istifadə etməyi planlaşdırırlar.

Şirkət nümayəndələri bildirirlər ki, mavi antilopun tarixi yaşayış mühitinə qaytarılması regionun ekosisteminin bərpasına kömək edə bilər. Bununla belə, layihənin iddialı xarakteri elmi ictimaiyyətdə etik məsələlər və yenidən yaradılmış növlərin müasir şəraitdə uzunmüddətli yaşama qabiliyyəti ilə bağlı müzakirələrə səbəb olur.

Qadir, Bizimyol.info