Aprelin 1-nə keçən gecə İsrail–İran qarşıdurması zonasında (“Şir nəriltisi” əməliyyatı) İsrail Müdafiə Qüvvələrinin (İMQ) düşmənin əsas infrastruktur obyektlərinə qarşı bir sıra yüksək dəqiqlikli zərbələr endirməsi, eləcə də terrorçu qruplaşmaların nüfuzlu funksionerlərinin zərərsizləşdirilməsi ilə yadda qaldı.

Bizimyol.info xəbər verir ki, İMQ-ın mətbuat xidməti Beyrut ətrafında iki ayrı əməliyyatın keçirildiyini təsdiqləyib. Hədəflər fəaliyyətləri birbaşa İran rejimi tərəfindən koordinasiya olunan terrorçu qruplaşmaların liderləri olub. Livan mənbələrinin məlumatına görə, Dahiya rayonunda həyata keçirilən hücumlar nəticəsində azı 7 nəfər həlak olub, daha 24 nəfər yaralanıb. İsrail tərəfi isə bildirib ki, zərbələr milli təhlükəsizliyə yönəlmiş təhdidlərin aradan qaldırılması məqsədilə dəqiq kəşfiyyat məlumatları əsasında endirilib.

Bununla yanaşı, İranda strateji obyektin – silah komponentlərinin istehsalı üçün istifadə olunduğu deyilən kimya zavodunun vurulması barədə məlumatlar yayılıb. Xarici KİV-lər ölkənin cənub-qərbində yerləşən metallurgiya müəssisələrinə də hücum edildiyini bildiriblər. Ekspertlərin fikrincə, bu zərbələr Tehranın hərbi potensialını zəiflətməyə yönəlib.

İsrailin şimalında vəziyyət gərgin olaraq qalır. Ordu sərhədyanı bölgələrdə yaşayan əhalinin təhlükəsizliyini artırmaq məqsədilə “Dəmir Qübbə” hava hücumundan müdafiə sisteminin fəaliyyət protokollarında dəyişikliklər edib.

Bizimyol.info