Mingəçevir Dövlət Dram Teatrı ilə bağlı daha bir qalmaqal yaranıb. 3 ay əvvəl vəzifəsindən öz ərizəsi ilə çıxan Mingəçevir Dövlət Dram Teatrının direktoru, Əməkdar artist İntiqam Soltan bu teatrın keçmiş aktyorunun böhtan və təhqirə görə cinayət məsuliyyətinə cəlb olunması üçün məhkəməyə müraciət edib.

Bizimyol.info xəbər verir ki, İntiqam Soltan (Həsənli) aktyor S.Məmmədovun Cinayət Məcəlləsinin 147 (böhtan) və 148-ci (təhqir) maddələri ilə cəzalandırılması üçün xüsusi ittiham qaydasında məhkəmədə iddia qaldırıb.

İki ildən artıq müddətdə Mingəçevir Dövlət Dram Teatrına rəhbərlik etdiyini deyən İntiqam Soltanın sözlərinə görə, ölkədə teatr sahəsi üzrə sayılıb-seçilən sənətkarlardan biridir. Onun bu teatra direktor təyin olunmağında məqsəd də orada baş verən neqativ hərəkətlərə son qoyulması, teatrın nüfuzunun artırılması, şəhər əhalisinin teatra gəlməsini aktivləşdirmək və mədəniyyət sahəsində müsbət dəyişikliklərə nail olmaq olub.

İntiqam Soltanın sözlərinə görə, teatrın keçmiş aktyoru onu sosial şəbəkələrdə, müxtəlif saytlarda törətmədiyi əməllərdə ittiham edib, barəsində həqiqətə uyğun olmayan məlumatlar yayıb: “Onun dedikləri çox ciddi ittihamlardır, məni cəmiyyətdə mənfi xarakterizə edəcək böhtandır. Məni teatrın büdcəsindən pulları mənimsəməkdə, Bakı Uşaq və Gənclər Teatrını maliyyələşdirməkdə ittiham edir. Guya mən başqa şəxslərin göstərişi ilə işləmişəm, peşəkarlığım yoxdur. Mənim barəmdə sosial şəbəkədə olan adi paylaşımın altında qeyri-etik sözlər yazır”.

Aktyor isə İntiqam Soltanın ittihamlarıyla razılaşmır. S.Məmmədov bildirib ki, sosial şəbəkələrdə onun haqqında qeyri-etik şərh yazmayıb. Onun sözlərinə görə, sosial media platformalarının birində müsahibəsi yayımlanıb. Orada "İntiqam Soltanın öz teatrından lazımsız geyim yaxud başqa ləvazimatlar gətirib, Mingəçevir Dövlət Dram Teatrında sənədləşdirərək dəyərindən artıq pul yazdırıb aparması" barədə danışıb: “Bunu da bütün teatr kollektivi bilir. Hamı bunu təsdiq edə bilər. Mingəçevir Teatrının pulunu Bakıdakı Uşaq və Gənclər Teatrının xeyrinə xərcləməsi barədə dediklərimə gəlincə, o, əksər vaxt ezamiyyət vərəqəsi alaraq Bakıya - öz evinə gedib. Amma sənədləşdirəndə Bakı Uşaq Teatrda hər hansı teatr tədbiri yaxud vacib iş üçün sənədə qeyd edilib”.

Aktyor şikayətin icraata götürülməməsini məhkəmədən xahiş edib.

Sonradan İntiqam Soltan məhkəməyə ərizə göndərərək, şikayətindən imtina etdiyini bildirib. Bu səbəbdən məhkəmə də onun ərizəsini nəzərə alaraq, şikayəti icraata götürməyib.

Qeyd edək ki, İntiqam Soltan mayın 1-dən öz ərizəsi ilə Mingəçevir Dövlət Dram Teatrının direktoru vəzifəsindən çıxıb. Onun bu addımının səbəbi olaraq, Mingəçevir Şəhər Məhkəməsi və Şəki Apelyasiya Məhkəməsinin qərar ilə razı olmaması göstərilir.

Söhbət işdən azad olunmuş Mingəçevir Dövlət Dram Teatrının ədəbi hissə müdiri Elçin Məhərrəmli ilə bağlı məhkəmə qərarından gedir. O, teatrın direktoru, əməkdar artist İntiqam Soltana qarşı iddia ilə məhkəməyə müraciət edərək, onun əmrinin ləğvini və işinə bərpa olunmasını istəyib. Mingəçevir Şəhər Məhkəməsi işə bərpa tələbi ilə bağlı iddianı təmin edib, Şəki Apellyasiya Məhkəməsi də qərarı qüvvədə saxlayıb.

İntiqam Soltan Elçin Məhərrəmli ilə bağlı qərarını haqlı saymırdı və Mədəniyyət Nazirliyinə müraciət etmişdi. Bu səbəbdən də həmin qərardan sonra özü işdən çıxmaq barədə ərizə ilə Mədəniyyət Nazirliyinə müraciət etmişdi. Nazirlik də ərizəni qəbul etdi və mayın 1-dən müqaviləyə xitam verdi.

Aytən, Bizimyol.info