Yeni Azərbaycan Partiyasının sədr müavini Tahir Budaqov, millət vəkili Ramil Həsən və bir qrup azərbaycanlı investor iş adamı Şimali Kipr Türk Cümhuriyyətinə gəlib.

Bizimyol.info xəbər verir ki, bu barədə ŞKTC Baş nazirliyindən verilən məlumatda bildirilir.

Qeyd edilib ki, keçən həftə Azərbaycanda baş nazir Ünal Üstel ilə keçirilən görüşlərdə müzakirə olunan məsələləri nəzərdən keçirmək və sərmayə sahələrini yerində görmək üçün bu dəfə ŞKTC-yə gələn Tahir Budaqov və başçılıq etdiyi nümayəndə heyəti bir günlük iş səfərindən sonra, Diplomatiya Forumunda iştirak etmək üçün Şimali Kipr Türk Respublikasının nümayəndə heyəti ilə Antalyaya gedəcək.

Səfər zamanı Azərbaycan nümayəndə heyəti ŞKTC-nin iş adamları ilə görüşəcək və xüsusilə təhsil, turizm, kənd təsərrüfatı və tikinti sektorlarında investisiya imkanları barədə ətraflı məlumat alacaq.

Mövzu ilə bağlı qısa açıqlama verən Baş nazir Ünal Üstel deyib: “ŞKTC-nin TDT üzvlüyündən və keçən il tərəflərimiz arasında imzalanan əməkdaşlıq protokolundan sonra ŞKTC-Azərbaycan əlaqələri çox ciddi və sürətlə inkişaf edir. Yadınızdadır, mən ötən həftə Yeni Azərbaycan Partiyasının sədr müavini Tahir Budaqovun dəvəti ilə Azərbaycana getmişdim. Biz burada çox məhsuldar iş görüşləri keçirdik və bu işlərin bir qismini ŞKTC-də davam etdirmək qərarına gəldik. İndi biz onları ölkəmizdə qəbul edirik.

Cənab Budaqovun nümayəndə heyətinə parlament üzvləri və iş adamları da daxildir. Gördüyümüz işləri nəzərdən keçirəcəyik və investor iş adamlarını yerli iş adamlarımızla bir araya gətirəcəyik. Bu və buna bənzər təmaslar getdikcə davam edəcək. ŞKTC-Azərbaycan xarici ticarət həcmini çox qısa müddətdə eksponent olaraq artıracağıq. Təhsil, turizm, kənd təsərrüfatı və tikinti sektorlarında ciddi investisiya imkanları var. Bunları qiymətləndirəcəyik. Bir millətin, üç dövlətin sözündən, vədindən dönməmək, qarşılıqlı sevgi, qardaşlıq və etimada əsaslanan əlaqələrimizi inkişaf etdirmək əzmindəyik”.

Qadir, Bizimyol.info