"İsveç Türkiyə qarşısında götürdüyü bütün öhdəlikləri yerinə yetirib və indi Şimali Atlantika Alyansına üzv olmağa hazırdır".

Bizimyol.info xəbər verir ki, bunu NATO-nun baş katibi Yens Stoltenberq Stokholmda keçirdiyi mətbuat konfransında deyib.

“İsveç bütün öhdəliklərini yerinə yetirdi, konstitusiyasını və qanunlarını terrorla mübarizəni genişləndirmək üçün dəyişdirdi, Türkiyəyə silah tədarükünə icazə verdi və indi mən onun yaxın gələcəkdə alyansa daxil olmasını səbirsizliklə gözləyirəm. İsveçin NATO-ya qəbul edilməsi Avropanın təhlükəsizlik planlarına uyğundur”, - deyə NATO-nun baş katibi bildirib.

Stoltenberqin sözlərinə görə, o, Türkiyə prezidenti Rəcəb Tayyib Ərdoğanla danışıb və İsveçin alyansa qəbulu ilə bağlı protokolu imzaladığına görə ona təşəkkür edib.

Bundan əvvəl Ərdoğan İsveçin NATO-ya qəbulu ilə bağlı protokolu parlamentə təqdim edib. Prosedura əsasən, sənəd ilkin olaraq Beynəlxalq Əlaqələr Komissiyasında nəzərdən keçiriləcək və təsdiqləndiyi təqdirdə bütövlükdə parlamentin səsverməsinə çıxarılacaq.

İsveçin NATO-ya qəbulu ilə bağlı protokol indiyədək alyansın 31 ölkəsi tərəfindən ratifikasiya edilib, yalnız Türkiyə və Macarıstan bunu təsdiq etməyib. Bu sənədin Ankara tərəfindən vaxtından əvvəl ratifikasiyasına dair razılıq NATO, Türkiyə və İsveç arasında iyulda Vilnüsdə NATO sammitindən əvvəl əldə edilib, lakin bundan sonra Türkiyə tərəfi ərizənin təsdiqlənməsi üçün bir sıra şərtlər irəli sürüb, o cümlədən terrorizmlə mübarizə və sürətləndirilməsi sahəsində əməkdaşlıq. Bundan əlavə Avropa İttifaqı ilə iqtisadi və viza inteqrasiyası da irəli sürülən şərtlər arasında olub.

Qadir, Bizimyol.info