Rusiya Ermənistana “Cənubi Qafqaz Dəmiryolu” (CQD) konsessiyası üzrə narahatlıq doğuran bütün məsələlər üzrə açıqlamalar verib.

Bizimyol.info xəbər verir ki, bunu Rusiya Xarici İşlər Nazirliyinin MDB ölkələri üzrə departamentinin direktoru Mixail Kalugin ölkə mətbuatına müsahibəsində bildirib.

O, aprelin 1-də Rusiya və Ermənistan liderlərinin görüşündə konsessiya ilə bağlı bütün məqamların müzakirə olunduğunu və tərəflər arasında gələcək işin gedişat qaydaları, prosedurlar və şərtlər barədə anlaşma əldə edildiyini qeyd edib.

Kalugin vurğulayıb ki, Ermənistan baş naziri Nikol Paşinyan açıqlayıb ki, konsessiya ilə bağlı məsələlər “Rusiyanın arxasında” müzakirə edilməyəcək. Rusiya tərəfi isə Ermənistan dəmiryolunun idarəçiliyinin ölkənin rəqabət üstünlüklərini məhdudlaşdırdığı iddiasını qəbul etmir; əksinə, bu, üstünlüklər yaradır. Onun sözlərinə görə, 2008-ci ildən bəri investisiyalar təxminən 30 milyard rubla çatıb, Ermənistan büdcəsinə isə 15 milyard rubllıq ödəniş edilib. CQD həmçinin ölkədə 2,5 min iş yerini təmin edən əsas işəgötürənlərdən biridir.

Kalugin “Tramp Marşrutu” layihəsinə də toxunub. O qeyd edib ki, layihəyə iki illik Rusiya-Azərbaycan-Ermənistan üçtərəfli işçi qrupunun fəaliyyəti əsas olub. 2023-cü ildə Meqri marşrutunun işə salınması nəzərdə tutulub ki, bu da Cənubi Ermənistan üzərindən Naxçıvana tranziti təmin etməklə Ermənistan və Azərbaycan dəmiryollarını birləşdirəcəkdi. Lakin erməni-amerikan təşəbbüsü bu inteqrasiyanı təmin etmir, Yerevan isə 2023-cü ildə Üçtərəfli işçi qrupun fəaliyyətini dayandırıb.

Kalugin həmçinin qeyd edib ki, İran-Amerika gərginliyi və ABŞ-ın marşrut üzərində nəzarəti layihənin reallaşmasını çətinləşdirir. Çin və Rusiya yükləri olmadan investisiyaların geri dönməsi çətin olacaq. Layihənin həyata keçirilməsində Ermənistan-İran sərhədində rus sərhədçilərinin mövcudluğu, Azərbaycanla birləşdirmək üçün Rusiya standartlı dəmiryol xəttinin çəkilməsi və 2038-ci ilə qədər CQD konsessiyasının qüvvədə olması əsas amillər kimi qalır.

Qeyd edək ki, Paşinyan konsessiyanın Qazaxıstan və ya digər dost ölkəyə verilməsini təklif etsə də, Rusiya bununla bağlı danışıqlar aparmadığını bəyan edib.

Qadir, Bizimyol.info