Avropa İttifaqı (Aİ) Böyük Britaniyaya ümumi bazara çıxış üzrə mövcud imtiyazların qorunması müqabilində müntəzəm maliyyə ödənişlərini bərpa etməyi tələb edib.

Bizimyol.info xəbər verir ki, “The Times” nəşrinin Brüsseldəki rəsmi mənbələrə istinadən yaydığı məlumata görə, tələb olunan məbləğ Britaniya iqtisadiyyatının miqyası və ölkənin Avropa tərəfdaşları ilə rüsumsuz ticarətdən əldə etdiyi faydalar nəzərə alınmaqla hesablanıb.

Bu məsələ 2026-cı ilin may ayında keçirilən danışıqlarda əsas mövzulardan birinə çevrilib. Danışıqlar uzun müddət davam edən qeyri-müəyyənlikdən sonra iqtisadi münasibətlərin sabitləşdirilməsinə yönəlib. Aİ rəsmiləri bildirirlər ki, vahid iqtisadi məkanda iştirak onun infrastrukturunun və inkişaf proqramlarının dəstəklənməsi üçün ortaq məsuliyyət tələb edir.

Nümunə kimi Avropa İttifaqı rəsmiləri İsveçrə ilə bağlanmış razılaşmanı göstərirlər. Aİ üzvü olmayan bu ölkə 2025-ci ildə bazarın əsas sektorlarına çıxışı qorumaq üçün İttifaqın Koheziya Fonduna hər il 375 milyon avro ödəməyə razılaşıb.

Lakin Böyük Britaniyanın daha böyük ticarət dövriyyəsi və ÜDM-i nəzərə alınaraq, Brüssel London üçün İsveçrədən təxminən üç dəfə yüksək məbləğ müəyyənləşdirib. Aİ-də vurğulanır ki, bu cür ödənişlər tam üzvlük olmadan azad ticarət zonasının üstünlüklərindən yararlanmaq istəyən tərəfdaş ölkələr üçün standart şərtdir.

Britaniya tərəfi hələlik bu şərtləri qəbul etməyə hazır olduğunu rəsmi şəkildə təsdiqləməyib. Londonda qeyd olunur ki, Aİ qarşısında yeni maliyyə öhdəlikləri yalnız ölkənin birlikdən çıxmasından sonra yaranmış tənzimləyici maneələrin əhəmiyyətli dərəcədə azaldılması ilə müşayiət olunmalıdır.

Gözlənilir ki, bu məsələ ilə bağlı yekun qərar cari maliyyə rübünün sonunadək qəbul ediləcək. Əgər tərəflər illik ödəniş məbləği üzrə razılığa gələ bilməsələr, Britaniya şirkətləri əlavə rüsumlarla və daha mürəkkəb gömrük prosedurları ilə üzləşə bilər ki, bu da Londonla Aİ ölkələri arasında ticarət dövriyyəsinə mənfi təsir göstərə bilər.

Qadir, Bizimyol.info