Ermənistan və Azərbaycan arasında silahlı münaqişə ehtimalı sıfırdır.

Bizimyol.info xəbər verir ki, bunu Ermənistanın iqtisadiyyat naziri Gevorq Papoyan mətbuat konfransında bildirib.

"İki il əvvəl hamı müharibənin istənilən an başlaya biləcəyindən danışırdı, indi isə hamı bu və ya digər məhsulun niyə satılmadığından və ya hələ satılmadığından danışır. Düşünürəm ki, bu, artıq çox yaxşıdır. İki il əvvəl nazir təyin olunduğum zaman əsas müzakirələrin başqa bir hücumun olub-olmayacağı ilə bağlı olduğunu çox yaxşı xatırlayıram. İndi isə əsas söhbət benzinin qiymətinin nə qədər düşüb-düşməməsi ilə bağlıdır", - deyə o bildirib.

Papoyan qeyd edib ki, indi "müharibə ehtimalı sıfırdır və bu gün insanlar artıq sülhdən danışırlar" və bunu böyük nailiyyət adlandırıb. "Siz bu sülhün nəticələrini qanunvericilik qərarları da daxil olmaqla müxtəlif qərarlarımızda görmüsünüz. Bir il əvvəl heç kim, o cümlədən siz də, Ermənistanla Azərbaycanın ticarət edəcəyini təsəvvür etmirdi", - deyə nazir bildirib.

8 avqust 2025-ci ildə Vaşinqtonda Ermənistanın Baş naziri Nikol Paşinyan və Azərbaycan Prezidenti İlham Əliyev Bakı ilə Yerevan arasında sülh yolu ilə həll və Azərbaycanın əsas hissəsi ilə Naxçıvan arasında nəqliyyat əlaqələrinin yaradılması haqqında birgə bəyannamə imzaladılar.

Qadir, Bizimyol.info