ABŞ-ın İranla ticarətə tətbiq etdiyi gömrük rüsumları qlobal ticarət üçün təhlükəli nəticələrə səbəb ola bilər.
Bizimyol.info xəbər verir ki, bu barədə İslam Respublikası Xarici İşlər Nazirliyinin (XİN) rəsmi sözçüsü Esmail Baqayi bildirib.
"Xarici İşlər Nazirliyinin sözçüsü həmçinin ABŞ-ın beynəlxalq ticarət sisteminə qarşı birtərəfli cəza tədbirlərinin təhlükəli nəticələri barədə xəbərdarlıq edib və Baş katib də daxil olmaqla, Birləşmiş Millətlər Təşkilatının və onun bütün orqanlarının beynəlxalq səviyyədə qanunun aliliyinin təmin edilməsində öz vəzifələrini yerinə yetirmək məsuliyyətini qeyd edib", - deyə nazirliyin açıqlamasında bildirilib.
Baqai, "ABŞ-ın İrana qarşı iqtisadi sanksiyalarının qanunsuz və qeyri-insani təbiətini, eləcə də bu sanksiyaların BMT Nizamnaməsinin və beynəlxalq hüququn fundamental prinsipləri və normaları, o cümlədən azad beynəlxalq ticarətin əsasları ilə daxili ziddiyyətini qeyd edərək, hər bir İran vətəndaşının fundamental hüquqlarını pozan və onlara xələl gətirən ABŞ iqtisadi sanksiyalarının insanlığa qarşı cinayət hesab edildiyini" vurğulayıb. Onun sözlərinə görə, sanksiya tətbiq edən ölkələr "bu cinayətlərin nəticələrinə görə məsuliyyət daşımalıdırlar".
Diplomat sonda bildirib ki, "İran xalqı 75 ildən çoxdur ki, müxtəlif bəhanələrlə ABŞ və onun bəzi müttəfiqləri tərəfindən qəddar və qanunsuz sanksiyalara və iqtisadi təzyiqlərə məruz qalır ki, bu da ABŞ-ın siyasi planlaşdırma və qərar qəbuletmə sistemində İran dövlətçiliyinə qarşı dərin kök salmış düşmənçiliyi nümayiş etdirir".
Daha əvvəl ABŞ prezidenti Donald Tramp İranla işgüzar münasibətdə olan bütün ölkələrə 25% gömrük rüsumu tətbiq olunacağını elan edib.
İranda iğtişaşlar 29 dekabrda İran rialının kəskin şəkildə düşməsi ilə başlayan və əksər böyük şəhərlərə yayılan küçə etirazlarından sonra başlayıb. Hakimiyyət orqanları təxminən 40 hüquq-mühafizə orqanı əməkdaşının ölümü barədə məlumat verib. İranın xarici işlər naziri Abbas Əraqçinin sözlərinə görə, 8 yanvardan bəri nümayişçilər arasında silahlı terrorçular peyda olub. İran hakimiyyəti iğtişaşlara görə İsraili və ABŞ-ı günahlandırıb. ABŞ prezidenti Donald Tramp əvvəllər İslam Respublikasına qarşı güc tətbiq etməyi ciddi şəkildə düşündüyü barədə xəbərdarlıq edib.
Qadir, Bizimyol.info
