Müzəffər Ali Baş Komandanın rəhbərliyi ilə 44 günlük Vətən müharibəsi: Tarixi qələbə, Ermənistanın müharibə cinayətləri və həqiqətlərin dünyaya çatdırılması

“XXI əsrin ən önəmli hadisələrindən biri – Azərbaycan Ordusunun Müzəffər Ali Baş Komandanı, cənab Prezident İlham Əliyevin rəhbərliyi ilə 27 sentyabr–10 noyabr 2020-ci il tarixlərində 44 gün davam edən “Vətən Müharibəsi”dir. Bu müharibə Azərbaycanın ərazi bütövlüyünü bərpa etməklə yanaşı, Cənubi Qafqazda yeni siyasi reallıqlar yaratdı. Tarixi qələbə həm xalqımızın qəhrəmanlığının, həm də güclü liderliyin nəticəsi oldu.

30 ilə yaxın işğal altında qalan torpaqlarımızda Ermənistan qeyri-qanuni məskunlaşma, mədəni irsimizə qarşı vandallıq və ekoloji terror həyata keçirmişdi. Uzun illər beynəlxalq təşkilatların qətnamələr qəbul etməsinə baxmayaraq, Ermənistan status-kvonu dəyişməmək siyasəti yürüdürdü. 2020-ci ilin payızında Ermənistanın təxribatları, hərbi-siyasi avantüraları Azərbaycanı məcbur etdi ki, öz suveren hüquqlarını güc yolu ilə bərpa etsin”.

Bu barədə Bizimyol.info xəbər portalına politoloq Nicat İsmayılov danışıb. Politoloq qeyd edib ki, Müzəffər Ali Baş Komandan İlham Əliyevin qətiyyətli əmri ilə başlayan əks-hücum əməliyyatları müasir hərb tarixində misilsiz nümunə kimi göstərilir.

Nicat İsmayılov

“Azərbaycan Ordusu yüksək texnologiyalar, müasir taktika və əsgər-rəhbər, xalq-iqtidar birliyinin gücü ilə qısa müddətdə Ermənistan ordusunu darmadağın etdi. Ermənistanın müharibə cinayətləri və insanlıq əleyhinə əməlləri 44 günlük müharibə dövründə də davam etdi. Ermənistan beynəlxalq humanitar hüququ kobud şəkildə pozdu. Rəsmi İrəvan, Azərbaycanın şəhərlərini raket atəşinə tutdu, dinc əhalini hədəf aldı – Gəncə, Bərdə, Tərtər, Mingəçevir kimi yaşayış məntəqələrinə ballistik raketlər atıldı, yüzlərlə mülki şəxs həlak oldu.

Qadağan olunmuş silahlardan istifadə etdi – Kassetli bombalar və fosforlu sursatlarla hücumlar qeydə alındı. Ermənistan Azərbaycana məxsus mədəni və dini abidələri hədəf aldı. Məscidlər, muzeylər, qəbiristanlıqlar dağıdıldı”-deyən politoloq vurğulayıb ki, bu əməllər sülh və insanlıq əleyhinə cinayətlər olmaqla, müharibə cinayətləri kimi beynəlxalq hüquqda öz təsdiqini tapmış faktlardır.

Müharibənin xronikası və siyasi nəticələri...

“44 gün ərzində Azərbaycan Ordusu hər gün yeni zəfərlər qazandı. Füzuli, Cəbrayıl, Zəngilan, Qubadlı azad edildi, Şuşa uğrunda döyüşlər isə qəhrəmanlığın zirvəsi oldu. 8 noyabr 2020-ci ildə Şuşanın işğaldan azad edilməsi Qələbənin rəmzi məqamına çevrildi.

10 noyabr 2020-ci il tarixində imzalanan üçtərəfli Bəyanat Ermənistanın kapitulyasiyası demək idi. Azərbaycan həm hərbi, həm siyasi müstəvidə tam qələbə qazandı.

Azərbaycan diplomatiyası 44 günlük müharibə dövründə və ondan sonrakı mərhələdə müharibə həqiqətlərini dünya ictimaiyyətinə çatdırmaq üçün mühüm addımlar atdı. Cənab Prezident İlham Əliyevin beynəlxalq media qurumlarına verdiyi müsahibələr, çıxışlar Azərbaycanın mövqeyini qlobal auditoriyaya birbaşa təqdim etdi. Dünya ictimaiyyəti Ermənistanın işğalçı siyasətini, törətdiyi müharibə cinayətlərini və Azərbaycanın haqq mübarizəsini daha aydın şəkildə gördü. Bu, Azərbaycanın beynəlxalq nüfuzunu möhkəmləndirdi və regionda yeni reallıqlar yaratdı”-deyə Nicat İsmayılov bildirib.

Politoloq qeyd edib ki, qələbənin strateji əhəmiyyəti, Vətən Müharibəsi nəticəsində, Azərbaycanın ərazi bütövlüyü bərpa olundu.

“Ermənistana qarşı illərlə davam edən beynəlxalq susqunluq qırıldı və regionda yeni nəqliyyat və enerji əməkdaşlığı imkanları açıldı.

Şərqi Zəngəzur və Qarabağ Azərbaycanın inkişaf gündəminin mərkəzinə çevrildi. Nəticə etibarı ilə, 44 günlük Vətən Müharibəsi Azərbaycan xalqının iradəsinin, birliyinin və Ali Baş Komandanın strateji liderliyinin təntənəsi oldu. Ermənistanın törətdiyi sülh və insanlıq əleyhinə cinayətlər isə həm beynəlxalq hüquq, həm də tarixi yaddaş qarşısında ifşa olundu. Azərbaycan dövləti bu həqiqətləri dünya ictimaiyyətinə çatdırmaqla həm öz haqq işini müdafiə edir, həm də beynəlxalq ədalətin bərqərar olması uğrunda mühüm töhfə verir.

Müzəffər Ali Baş Komandan, cənab Prezident İlham Əliyevin qətiyyəti, uzaq görən xarici siyasəti nəticəsində Azərbaycan bütün dünyada gücünü sübut etdi. Yaşasın Azərbaycan, Yaşasın Müzəffər Ali Baş Komandan!”- Nicat İsmayılov fikrini yekunlaşdırıb.

İradə Cəlil, Bizimyol.info

Azərbaycan Respublikasının Medianın İnkişafı Agentliyi (MEDİA)