Son illərdə ölkədə nikah statistikasında maraqlı tendensiya müşahidə olunur.

Rəsmi rəqəmlərə əsasən, qohum evliliyinin qadağan edilməsindən sonra ümumi nikahların sayında azalma qeydə alınıb. Bu, həm sosial, həm də psixoloji aspektlərdən təhlil edilməyə ehtiyac duyulan bir məsələdir.

Qohum evliliyi niyə qadağan edildi?

Qohumlar arasında nikahın qarşısının alınmasının əsas səbəbi genetik fəsadlarla bağlıdır. Tibb mütəxəssisləri illərdir xəbərdarlıq edirdilər ki, yaxın qohumların ailə qurması nəticəsində dünyaya gələn uşaqlarda irsi xəstəliklər, fiziki və əqli gerilik ehtimalı yüksəkdir. Bundan əlavə, bu cür evliliklərin sosial müstəvidə də problemlərə yol açdığı göstərilirdi.

Qadağanın nikah statistikasına təsiri

Qadağadan sonra bəzi bölgələrdə nikahların sayı nəzərəçarpacaq dərəcədə azalıb. Çünki illərlə formalaşmış adət və ənənələr, xüsusilə rayon və kəndlərdə ailələrin yaxın qohumlar arasında evlilikləri üstün tutması geniş yayılmışdı. Qadağa tətbiq olunandan sonra həmin ailələr başqa seçimlər qarşısında qalaraq nikahı təxirə salmağa başlayıblar.

Psixoloji yanaşma

Mütəxəssislərin fikrincə, nikah sayındakı azalmanın müvəqqəti xarakter daşıması ehtimal olunur. Çünki gənc nəsil artıq daha açıq düşüncəlidir və sosial şəbəkələr, təhsil mühiti yeni tanışlıqlara şərait yaradır. Bu isə qohumluq dairəsindən kənar evliliklərin artmasına gətirib çıxara bilər.

Qohum evliliklərinin qadağanı qısamüddətli olaraq nikahların sayına mənfi təsir göstərsə də, uzunmüddətli perspektivdə daha sağlam nəsil, sağlam cəmiyyət formalaşmasına zəmin yaradacaq. Sosial şüurun dəyişməsi ilə paralel olaraq nikahların sayı da bərpa oluna bilər.

Leyla Mirzə, Bizimyol.info