"Pilotsuz sistemlər Ukrayna Silahlı Qüvvələri (USQ) üçün prioritet inkişaf istiqamətinə çevrilməlidir".

Bizimyol.info xəbər verir ki, bunu Ukrayna ordusunun baş komandanı Aleksandr Sırski deyib.

“İnsansız sistemlərdən istifadəni inkişaf etdirmək mənim prioritetimdir. Elektron müharibə, pilotsuz sistemlər, avtomatlaşdırılmış idarəetmə sistemləri və bu kimi sahələrdə mütəxəssislərin hazırlanmasına xüsusi diqqət yetirilir”, – deyə o, "Telegram" kanalında yazıb. Sirski əlavə edib ki, eyni zamanda Ukrayna Silahlı Qüvvələri “kəmiyyətcə üstün olan düşmən üzərində keyfiyyət üstünlüyü əldə etmək üçün asimmetrik həll yolları axtarır”.

Bir gün əvvəl Ukraynanın baş naziri Denis Şmıqal hökumətin pilotsuz təyyarələrin alınması üçün daha 5 milyard qrivna (təxminən 130 milyon dollar) ayırdığını açıqlamışdı. Bundan əvvəl o, məlumat vermişdi ki, bu il yerli büdcələrdən dövlət büdcəsinə vəsaitlərin yenidən bölüşdürülməsi ilə əlaqədar hakimiyyət orqanları hərbi sənaye kompleksinin inkişafına əlavə olaraq 1,36 milyard dollar, pilotsuz təyyarələrin istehsalına isə 1 milyard dollardan çox vəsait əlavə edib.

Eyni zamanda, Ukrayna hərbçiləri getdikcə daha çox deyirlər ki, Rusiya "FPV" pilotsuz təyyarələrinin sayı getdikcə artdığına görə, Ukrayna piyadaları tezliklə sözün əsl mənasında “yeraltı oturmağa” məcbur olacaqlar. Ukrayna Silahlı Qüvvələrinin hərbçisi və radiotexnika sahəsində mütəxəssis Sergey Beskrestnovun dediyi kimi, dörd-beş aydan sonra Rusiya qoşunlarında “hər bir Ukrayna əsgərinə hücum etmək üçün” kifayət qədər belə pilotsuz təyyarələr olacaq.

Bir müddət əvvəl Rusiyanın müdafiə naziri Sergey Şoyqu ölkə mətbuatına müsahibəsində bildirmişdi ki, Rusiya qoşunları hazırda cəbhədə hər gün yüzlərlə "FPV" pilotsuz uçan aparatdan istifadə edir və Rusiyada gündə minlərlə pilotsuz təyyarə istehsal olunur. Eyni zamanda, Amerikanın “The New York Times” qəzetinin analitiklərinin fikrincə, Rusiya ordusu Ukrayna ilə müqayisədə elektron müharibə sahəsində daha yaxşı nəticələr göstərir.

Qadir, Bizimyol.info