Ermənistanın baş naziri Nikol Paşinyan yenidən bildirib ki, iyun ayındakı parlament seçkilərində qalib gələrsə, Rusiyaya səfər etməyi planlaşdırır.

Bizimyol.info xəbər verir ki, Paşinyanbu barədə seçki kampaniyası çərçivəsində Gegarkunik bölgəsində seçicilərlə görüşündə deyib.

“Rusiya Prezidenti 1 iyunda mənə doğum günümü təbrik etmək üçün zəng etdi. Ancaq açıqdır ki, sadəcə təbriklərlə kifayətlənməyib, işgüzar söhbət də apardıq. Razılaşdıq ki, seçkilərdən sonra mən yenidən səfər edəcəyəm, görüşəcəyik və bütün aktual məsələləri həll edəcəyik”, - deyə o qeyd edib.

O, həmçinin vurğulayıb ki, onun əsas məqsədi Ermənistanda heç kimin “Ermənistana kim ehtiyac duyur” deyə iddia edə bilməməsi və ölkənin həmişə seçim imkanına sahib olmasıdır.

1 iyunda Vladimir Putin Paşinyanla telefon danışığı zamanı 29 mayda Astana şəhərində keçirilmiş Yüksək Avrasiya İqtisadi Şurasının iclasının nəticələrini müzakirə edib və baş naziri doğum günü münasibətilə təbrik edib. Ermənistan hökumətinin mətbuat xidməti məlumat verir ki, tərəflər ikitərəfli və çoxtərəfli gündəlikdəki aktual məsələlər barədə fikir mübadiləsi aparıblar. Paşinyan Rusiyanın prezidentinə balanslı mövqeyi, dostyana ton və bir sıra fikir ayrılığı doğuran məsələlərdə göstərdiyi dəstəyə görə təşəkkürünü bildirib. Tərəflər yaxın zamanda görüşərək müzakirələri davam etdirməyə razılaşıblar.

Bizimyol.info