Vyanada “Eurovision-2026” beynəlxalq mahnı müsabiqəsinin ilk yarımfinalı başa çatıb. Səsvermənin nəticələrinə görə, İsrailin nümayəndəsi Noam Bettan seçmə mərhələsini keçərək finala vəsiqə qazanıb.

Bizimyol.info xəbər verir ki, ilk yarımfinal 12 may, çərşənbə axşamı günü Uiener Stadthalle arenasında keçirilib. Final üçün 10 yer uğrunda 15 ölkənin iştirakçısı mübarizə aparıb. "Deutsche Welle" nəşri xəbər verir ki, ölkənin yarışmada iştirakına etirazlara baxmayaraq, İsrail ifaçısı Noam Bettan tamaşaçılar tərəfindən hərarətlə qarşılanıb. Onun çıxışı həm tamaşaçılar, həm də ekspertlər tərəfindən yüksək qiymətləndirilib.

İsrailin xarici işlər naziri Gideon Saar artıq sosial şəbəkələrdə ifaçını təbrik edib, onun mahnısını və peşəkar ifasını yüksək qiymətləndirib. “Noam, finalda sənə uğurlar arzulayırıq,” – deyə siyasətçi 16 mayda keçiriləcək final çıxışı öncəsi dəstəyini bildirib.

İsraillə birlikdə bu il yarışın əsas favoriti sayılan iştirakçılar da finala yüksəlib. Onlar arasında Finlandiyadan duet, Yunanıstandan Akylas və Moldovadan repçi Satoshi var. Finala çıxanlar siyahısına həmçinin İsveç, Xorvatiya, Litva, Polşa, Serbiya və Belçika daxil olub.

Bəzi ölkələr üçün isə ilk yarımfinal yarışmanın sonu olub. Səsvermənin nəticələrinə görə, Estoniya, Gürcüstan, Monteneqro, San-Marino və Portuqaliya nümayəndələri finala çıxa bilməyib.

“Eurovision-2026”nın ikinci yarımfinalı 14 may, cümə axşamı günü keçiriləcək və final üçün əlavə 10 iştirakçı müəyyənləşəcək. Qeyd edək ki, Avstriya yarışmaya keçən il qalib ölkə kimi ev sahibliyi edir. Avtomatik olaraq finalda “Böyük beşlik” ölkələrinin – Böyük Britaniya, Almaniya, İtaliya, Fransa və İspaniya – nümayəndələri də iştirak edəcək.

Bizimyol.info