Çin Xalq Respublikasının Tehrandakı səfirliyi regionda artan hərbi və siyasi gərginlik fonunda İrandakı vətəndaşlarını ölkəni dərhal tərk etməyə çağırıb.

Bizimyol.info xəbər verir ki, səfirliyin rəsmi resurslarında yayılan məlumatda bildirilir ki, İranın hava məkanı mülki uçuşlar üçün açıq olsa da, təhlükəsizlik vəziyyəti hələ də “kövrək və proqnozlaşdırılmazdır”. Vətəndaşlara kommersiya reysləri və ya mövcud quru yolları vasitəsilə ölkəni tərk etmək tövsiyə olunur.

Diplomatik nümayəndəlik İranda qalmaq məcburiyyətində olan vətəndaşlara aşağıdakı ehtiyat tədbirlərini görməyi tövsiyə edib:

• Həssas ərazilərdən uzaq durmaq: Hərbi obyektlər, hökumət binaları və strateji infrastruktur sahələrinə yaxınlaşmamaq;
• Kütləvi toplaşmalardan qaçmaq: İnsanların sıx olduğu yerlərdən və etiraz aksiyalarından kənarda qalmaq;
• Rəsmi xəbərdarlıqları izləmək: Səfirliyin və yerli hakimiyyət orqanlarının təhlükəsizlik bildirişlərinə operativ əməl etmək.

Səfirlik həmçinin İrana səfər edənlərin konsulluq dəstəyi almaqda çətinliklərlə üzləşə biləcəyini vurğulayıb və ölkəni tərk etmək imkanı olanların bundan dərhal istifadə etməsini tövsiyə edib.

Xatırladaq ki, son günlər İsrail və ABŞ-ın mümkün hərbi müdaxiləsi barədə xəbərlər regiondakı gərginliyi artırıb. Çinlə yanaşı, bir sıra digər ölkələr də vətəndaşlarına İranı tərk etmələri barədə xəbərdarlıq ediblər.

Bizimyol.info