Pentaqon bildirir ki, ya İran öz zənginləşdirilmiş uranını ABŞ-a təhvil verəcək, ya da Vaşinqton bu nüvə materiallarını zorla çıxaracaq.

Bizimyol.info xəbər verir ki, bunu ABŞ müdafiə naziri Pit Heqset brifinqdə bildirib.

“Onlar ya bunu (zənginləşdirilmiş uranı) bizə təhvil verəcəklər, bu barədə ABŞ prezidenti Donald Trampın açıqlaması olmuşdu, ya da biz özümüz götürəcəyik, əgər lazım gəlsə. 2025-ci ilin yayında “Gecə Çəkici” əməliyyatında da bunu etmişdik”, - deyə o bildirib. Həmin əməliyyat çərçivəsində 22 iyun 2025-ci ildə ABŞ İranın Fərdo, Natanz və İsfahan şəhərlərindən nüvə obyektlərinə hava zərbələri endirmişdi.

“Uranla bağlı yenə deyirəm: biz onu izləyirik, onların nəyə malik olduğunu bilirik. Onlar bunu təhvil verəcək və biz lazım olsa, hər hansı zəruri vasitələrlə onu ala bilərik”, - deyə Heqset əlavə edib.

ABŞ lideri əvvəlcə "Truth Social" səhifəsində yazmışdı ki, Tehran artıq uranı zənginləşdirməyəcək və ABŞ “İranla əməkdaşlıq şəraitində” onun zənginləşdirilmiş uranını çıxaracaq. Tehran tərəfdən isə bu barədə təsdiq gəlməyib.

Bizimyol.info