ABŞ-ın dövlət borcu çərşənbə günü rekord həddə çataraq 39 trilyon dolları keçib.
Bizimyol.info xəbər verir ki, bu göstərici ABŞ və İsrailin İrana qarşı başlatdığı müharibədən cəmi bir neçə həftə sonra qeydə alınıb.
Bu misilsiz rəqəm administrasiyanın bir-biri ilə rəqabət aparan prioritetlərini üzə çıxarır: iri vergi islahatının qəbul edilməsi, müdafiə xərclərinin və miqrasiya nəzarətinin artırılması, eyni zamanda borcun azaldılması. Halbuki, Donald Trump həm seçki kampaniyası dövründə, həm də prezident kimi çıxışlarında dövlət borcunu azaltmağa söz vermişdi.
Hökumət Hesabatlılığı Ofisi dövlət borcunun artmasının amerikalılar üçün bir sıra nəticələrini qeyd edir. Bunlara ipoteka və avtomobil kreditləri kimi borclanma xərclərinin artması, bizneslərin investisiya imkanlarının azalması səbəbilə maaşların aşağı düşməsi və mal-xidmətlərin bahalaşması daxildir.
Amerikanın uzunmüddətli maliyyə çətinlikləri barədə məlumatlılığı artırmaq üçün yaradılan qeyri-kommersiya təşkilatı "Peter G. Peterson Fondu"nun sədri və baş icraçı direktoru Maykl Peterson verdiyi açıqlamada bildirib ki, "bu həyəcan verici artım tempini və gələcək nəslin üzərinə qoyduğumuz əhəmiyyətli maliyyə yükünü qəbul etməliyik".
Borcun artım trayektoriyası da ciddi narahatlıq doğurur. Federal borc həm Respublikaçı, həm də Demokrat prezidentlər dövründə artıb; son illərdə isə müharibələr, pandemiya dövründə genişmiqyaslı xərclər və vergi güzəştləri bu prosesi daha da sürətləndirib.
Cəmi beş ay əvvəl ABŞ-ın dövlət borcu 38 trilyon dollar, ondan iki ay əvvəl isə 37 trilyon dollar idi. Mövcud artım tempi davam edərsə, bu payız keçiriləcək seçkilərdən əvvəl borcun 40 trilyon dollara çatacağı proqnozlaşdırılır.
Ağ Evin iqtisadi müşaviri Kevin Hassett isə bildirib ki, İranla müharibə ABŞ-a indiyədək 12 milyard dollardan çox vəsaitə başa gəlib. Müharibənin nə vaxt başa çatacağı hələlik məlum deyil.
Ağ Evin sözçüsü Kuş Desai isə administrasiyanın mövqeyini müdafiə edərək qeyd edib ki, Trampın yenidən hakimiyyətə qayıtdığı ilk ildə federal büdcə kəsiri azalıb.
ABŞ Maliyyə Nazirliyinin məlumatına görə, 2025-ci maliyyə ilində dövlət xərcləri 7,01 trilyon dollar, gəlirlər isə 5,23 trilyon dollar təşkil edib və nəticədə 1,78 trilyon dollarlıq büdcə kəsiri yaranıb. Bu isə əvvəlki illə müqayisədə 41 milyard dollar azalma deməkdir.
Desainin sözlərinə görə, kəsirin azalması fərdi vergi gəlirlərinin artması, dövlət aparatının ixtisarı və sosial ödənişlər sahəsində sui-istifadələrə qarşı sərt tədbirlər hesabına mümkün olub. O əlavə edib ki, bu proses davam etdikcə ABŞ-ın büdcə kəsiri və borcun ÜDM-ə nisbəti daha müsbət istiqamətdə dəyişəcək.
Qadir, Bizimyol.info
