Ukrayna Prezidenti Vladimir Zelenski müttəfiqlərinin təhlükəsizlik zəmanətləri olsa belə, Donbası heç vaxt tərk etməyəcəyini bildirib.
Bizimyol.info xəbər verir ki, bu barədə Zelenski "Corriere Della Sera"ya verdiyi müsahibədə bildirib.
"Açıq olmaq istəyirəm: Mən Donbası və orada yaşayan 200.000 ukraynalını heç vaxt tərk etməyəcəyəm. Niyə bunu etməliyəm? Çünki Putin bunu sülh üçün şərt qoyur? Və o, dərhal yeni tələblər irəli sürəcəkmi? Xeyr, mən buna getməyəcəyəm", - deyə Prezident qeyd edib.
O, həmçinin bildirib ki, ən yaxşı müdafiə istehkamları orada yerləşir və Ukrayna qoşunlarını geri çəkərsə, rusların ölkənin mərkəzinə açıq yolu olacaq.
Zelenski əlavə edib ki, ABŞ təhlükəsizliyi təmin etmək üçün qoşun göndərsə belə, risklər qalır: "Paralellər çəkmək istəmirəm, amma gəlin Əfqanıstandan qoşunların çıxarılmasını xatırlayaq. 10 ildən sonra Tramp deyil, başqa bir ABŞ prezidenti qoşunlarını çıxarmaq qərarına gəlsə, nə baş verəcək? Bizə güclü müdafiə lazımdır. Ukraynanın müdafiə xətti", - deyə Zelenski bildirib.
O, həmçinin qeyd edib ki, ABŞ-ın döyüşlərə son qoymaq üçün atəş xəttini dondurmaq təklifini qəbul edib. "Lakin ruslar imtina etdilər və Donbasdan tamamilə çəkilməyimizi istəyirlər. Sonra amerikalılar cəbhənin hər iki tərəfində silahsızlaşdırılmış zonalar və azad iqtisadi zonalar təklif etdilər. Mən bunun hər iki tərəfə şamil edilməli olduğunu dedim, amma ruslar cavab verdilər ki, bu, yalnız bizim tərəfimizə şamil edilməlidir. Bu, təmiz dəlilikdir", - deyə o qeyd edib.
Prezident qeyd edib ki, Ukraynanın amerikalılarla təhlükəsizlik zəmanətləri var, lakin onlar sənədləri yalnız ruslarla müqavilə kontekstində imzalamağa hazırdırlar. Avropalılarla protokol da hazırdır, lakin o da imzalanmayıb. Ukraynanın yenidən qurulması ilə bağlı razılaşmalar var, lakin bu, yalnız sülhdən sonra başlaya bilər: "Biz 20 maddəlik plan və ərazi nəzarəti məsələsində ilişib qalmışıq. Amerikalılar ərazi mübadiləsi haqqında düşünürlər, ruslar isə bizim getməyimizi istəyirlər. Mübadilə bizim maraqlarımıza uyğun deyil və Moskvanın geridə qoyacağımız ərazilərə nəzarət etmək üçün çoxlu qüvvəyə ehtiyacı var... Niyə ərazimizi vətənimizin bir hissəsi olan başqa bir şeylə dəyişdirməliyik?", - deyə o bildirib.
Daha əvvəl prezident qeyd etmişdi ki, ABŞ-ın İrandakı müharibəsi nəzərə alınmaqla, hava hücumundan müdafiə raketlərinin istifadəsi ilə bağlı mənfi aspektlər var. Eyni zamanda, o qeyd etmişdi ki, bunun da üstünlükləri var, çünki hamı Rusiyanın təhlükəsizliyin qarantı olmadığını başa düşür.
O, həmçinin Qərb mediasında Ukraynanın Donbası təhvil verməməsi halında Rusiyanın danışıqlar prosesindən çıxa biləcəyi ilə bağlı məlumatlara cavab olaraq bildirib ki, ölkəmizin bu ehtimal olunan vəziyyət üçün "B planı" var.
Qadir, Bizimyol.info
