İran Körfəzi Pro Liqasında ilk dəfə çempion olan Təbriz komandasının "Traktor" azarkeşləri bayram şənliklərində 15 dəqiqə dayanmadan alqışlar edərək dünya rekordu qırıblar.

Bizimyol.info "trthaber"ə istinadən xəbər verir ki, Təbrizdəki Yadigar-ı İmam Stadionunda traktorçuların çempionluğu şənliyi keçirilib.

On minlərlə təbrizlinin iştirakı ilə çempionluğunu böyük coşqu ilə qeyd edən traktorsevərlər 15 dəqiqə dayanmadan alqışlarla adlarını Ginnesin Rekordlar Kitabına yazdırdılar.

On minlərlə "Traktor" azarkeşi tribunaları dolduraraq Azərbaycan türkcəsində himn oxuyub:

“Külək yatar, sel yatar, traktor bayrağı yatmaz”

Qızılgüllər solur, sümbüllər solmaz, çalışqan komandamız solmaz

Biz traktorsevərik, heç kim türklər qədər çalışqan olmaz...

Bayram mərasimlərində Ginnesin Rekordlar Kitabının İran nümayəndəsi də iştirak edib.

Nümayəndə İranın rəsmi xəbər agentliyi İRNA-ya deyib: "Azarkeşlər üçün dünya rekordu 12 dəqiqə ilə məhdudlaşırdı, lakin "Traktor" azarkeşləri 15 dəqiqəlik mahnı oxumaqla bu rekordu qırdılar. Bu tarixi nailiyyət rəsmi olaraq Ginnesin Rekordlar Kitabına düşəcək".

Bayram şənlikləri zamanı pərəstişkarlar tribunaları dolduraraq 2024-cü il mayın 19-da keçmiş prezident İbrahim Rəisi ilə birlikdə helikopter qəzasında həlak olan Təbrizin keçmiş cümə namazı İmam Ayətullah Əli Haşimin xatirəsini yad ediblər.

Təbrizdə gecə yarısına qədər davam edən bayram şənlikləri azarkeşlər tərəfindən bayraq və pankartlarla bəzədilmiş küçələrdə rəngarəng səhnələr yaradıb.

Şərqi Azərbaycan vilayətinin Təbriz şəhərində yerləşən "Traktor" Futbol Klubu İranda türklərin dəstəklədiyi ən çox azarkeşə malik komanda kimi tanınır.

Təbrizlilər iki həftə əvvəl liqanın 28-ci həftəsində səfərdə "Şəms Azər"i 4:0 hesabı ilə məğlub edərək, liqanın başa çatmasına iki həftə qalmış tarixlərində ilk dəfə liqa çempionu elan ediblər. "Traktor" dünən liqanın 30-cu həftəsində "İstiqlal Huzistan"la səfərdə oynadıqdan sonra çempionluq kubokunu qazanıb.

Qadir, Bizimyol.info