“18 yaşdan sonra yetkin insanlar ən azı 7 saat yatmalıdırlar".

Bizimyol.info "AA"ya istinadən xəbər verir ki, Güven Xəstəxanası Nevrologiya şöbəsindən Prof. Dr. Kamil Kadir Topalkara keyfiyyətli, sağlam yuxu üçün görülməli və qaçınılması lazım olan məsələlər haqqında məlumat verdi.

Xəstəxanadan verilən açıqlamaya görə, kifayət qədər yuxu almamaq bütün immunitet sistemini zəiflədir. İmmuniteti zəifləmiş orqanizm bütün digər xroniki və otoimmün xəstəliklərə qarşı həssas olur. Açıqlamada fikirlərinə yer verilən Prof. Dr. Kamil Kadir Topalkara yuxusuzluğun xroniki bir xəstəlik olduğunu və beynin yuxu zamanı özünü təmizləyə bildiyini vurğulayaraq, orqanizmin sirkadiyalı bir ritmə sahib olduğunu və buna uyğunlaşmanın bizi digər xəstəliklərdən qoruyucu hala gətirəcəyini qeyd edib.

"Yuxu problemləri adi hala çevrilir"

Demək olar ki, bütün canlıların yuxu dövrü olduğunu ifadə edən Topalkara: "Bütün canlıların yuxuya ehtiyacı var. Yerin öz oxu ətrafında təxminən 24 saat davam edən fırlanması nəticəsində yaranan biokimyəvi, fizioloji və davranış ritmlərinin canlılar üzərində təkrarlanmasına “sirkadiyalı ritm” deyirik. Bədənimizin də öz ritmi var. Günəş çıxanda oyanmaq, hava qaralanda yatmaq lazımdır. Bütün hüceyrələrimiz və genlərimiz bu ritmə uyğun işləyir.

Bu ritmə əməl etməsək, təbii olaraq problemlər yaranır. Yeni doğulmuş körpələr çox uzun saatlar yata bilsələr də, 18 yaşından sonra böyüklər ən azı 7 saat sağlam yuxuya sahib olmalıdırlar. Orta hesabla 7-8 saat yuxudan sonra özümüzü daha canlı və enerjili hiss edirik", - deyə qeyd edib.

"Beyin yuxu zamanı özünü təmizləyir"

Topalkara, yatmağın beynin dincəlməsində və yenilənməsində çox təsirli rol oynadığını ifadə edib:  “Yatarkən beynimizə dincəlmək imkanı veririk. Biz gün ərzində çoxlu hadisələrlə qarşılaşırıq və çoxlu məlumatlara məruz qalırıq. Beynimiz bunları yuxu zamanı birləşdirir, toplayır və təmizləyir. Yuxusuz olduğumuz müddətdə beyin dincələ bilməz. İnsan istirahət edə bilməyəndə proses yuxu pozğunluqları ilə başlayır və müxtəlif pozğunluqlarla davam edir. Yuxusuzluq immunitet sistemimizi zəiflədir. Yuxu insanın ən əsas ehtiyaclarından biridir. Bu məsələ düşündüyümüzdən də önəmlidir”, - deyə doktor bildirib.

"Sağlam yuxu üçün qaydalara əməl edin"

Sağlam və keyfiyyətli yuxu üçün qaydaların aydın olduğunu vurğulayan Topalkara: "Yataq otağı qaranlıq və sərin olmalıdır. Otaq temperaturu 21-22 dərəcədən çox olmamalıdır və tamamilə qaranlıq olmalıdır. Səs-küydən uzaq durmalı və lazım gələrsə qulaqcıqlardan istifadə etməliyik. Yatmadan ən az 3 saat əvvəl yemək və içməyi dayandırmalıyıq. Xüsusilə spirtli içkilər yuxu keyfiyyətinizi aşağı salacaq. Yatağınız və paltarınız təmiz, otağınız geniş olmalı və havalandırılmalıdır. Qalın yorğan və ya digər örtüklər altında yatmaqdansa, daha yüngül örtüklərə üstünlük verməliyik. Nəfəs alma ritmimizi pozmayacaq şəkildə özümüzü örtməliyik", - deyə bildirib.

Türk cəmiyyətində bütün yaş qruplarının 15-20 faizinin yuxusuzluqdan əziyyət çəkdiyinə işarə edən Topalkara sözlərini belə tamamlayıb: "Yalnız böyük yaş qruplarında bu nisbət yüzdə 40-50 ətrafındadır. 65-70 yaşdan etibarən nisbət açıq şəkildə artır. Gecə xorultu və yuxu apnesi də yuxusuzluğun səbəblərindəndir. Əgər insanda bu problemlər varsa, o, keyfiyyətli və fasiləsiz yuxuya sahib ola bilməz. Narahat ayaq sindromu olan insanların əksəriyyətində yuxusuzluq problemlərini görürük. Bu tip pozğunluqlarla bağlı şikayətləriniz varsa, gecikmədən mütəxəssis həkimə müraciət etməlisiniz. Heç bir canlı yuxusuz yaşaya bilməz və əmin olun ki, yuxuya ən çox ehtiyacımız var. Sağlam və keyfiyyətli yuxu bütün həyat keyfiyyətinizi yaxşılaşdıracaq".

Qadir, Bizimyol.info