Almaniya kansleri Fridrix Merz ölkədə yaşayan suriyalıların üç il ərzində vətənlərinə qaytarılması planlarını açıqlayıb.

Bizimyol.info xəbər verir ki, bu barədə məlumatı "Welt" qəzeti yayıb.

Merzin sözlərinə görə, Almaniya və Suriyanın müvəqqəti prezidenti Əhməd əl-Şəraa ilə birlikdə Almaniyanın inkişaf və daxili işlər nazirlikləri, eləcə də kanslerin idarəsinin iştirak etdiyi işçi qrupu yaradılacaq. Yaxın günlərdə alman nümayəndə heyəti tanışlıq səfəri üçün Suriyaya yollanacaq.

“Müharibənin bitməsindən bir il sonra Suriyadakı vəziyyət əhəmiyyətli dərəcədə yaxşılaşıb, buna görə də qoruma ehtiyaclarını yenidən qiymətləndirmək lazımdır. Almaniyada yaşamaq hüququ olmayan şəxslər ölkəni tərk etməlidir”, - deyə Merz vurğulayıb. O, əlavə edib ki, əsas diqqət qanun pozuntuları etmiş və ya etibarlı yaşayış icazəsi olmayan şəxslərə yönələcək.

Bununla yanaşı, yaxşı inteqrasiya olmuş və Almaniyada qalmaq istəyən suriyalılar ölkədə yaşamağa davam edə biləcək. Merz bildirib ki, geri qayıdanlar Suriyanın bərpasında iştirak edəcək və Almaniya bu prosesi bərpa proqramları, məsləhətlər və investisiyalar vasitəsilə dəstəkləyəcək. Onun sözlərinə görə, bu çərçivədə təxminən 200 milyon avro su təchizatı və iqtisadi əlaqələrin gücləndirilməsinə ayrılacaq.

Suriyanın prezidenti Əhməd əl-Şəraa qeyd edib ki, hər kəsin hüquqları qorunacaq və geri dönən vətəndaşlar üçün “səmərəli birgəyaşayış” təmin ediləcək. Merz əlavə edib ki, tərəflər həmçinin geri qayıdanların Almaniya şirkətlərində Suriyada işləmə imkanlarını müzakirə ediblər.

Bizimyol.info