Amerika Birləşmiş Ştatları ilə İran arasında baş verən dörd həftəlik silahlı münaqişə ərzində ABŞ 850-dən çox "Tomahawk" qanadlı raketini İslam Respublikasına atıb.

Bizimyol.info xəbər verir ki, bu barədə "The Washington Post" (WP) mənbələrə istinadən məlumat yayıb.

Mənbələrin bildirdiyinə görə, bu qədər yüksək dəqiqlikli raketlərin sürətlə istifadəsi ABŞ hərbi idarəsinin bir sıra rəsmilərində narahatlıq yaradıb və Pentaqonun döyüş hazırlığını necə artırmaq barədə müzakirələrə səbəb olub. Rəsmilər qeyd ediblər ki, raketlərin əksəriyyəti Tehrana qarşı əməliyyatın ilk günlərində istifadə olunub.

Pentaqonun ABŞ Silahlı Qüvvələrinin istifadəsində olan raketlərin dəqiq sayını açıqlamadığı bildirilir, lakin illik istehsalın yalnız bir neçə yüz ədəd olduğu qeyd olunur.

Mənbələr həmçinin vurğulayıblar ki, hərbi idarə istifadə olunan raketlərin sayını izləyir və onların istifadəsinin ABŞ-ın İranla kampaniyasına və gələcək mümkün hərbi əməliyyatlara təsirini qiymətləndirir. Bir rəsmi raketlərin sayını “narahatlıq doğuracaq qədər az” adlandırsa da, digəri Pentaqonun tezliklə Yaxın Şərqdə "Tomahawk" ehtiyatını tükənə biləcəyini bildirib.

Rəsmilər həmçinin qeyd ediblər ki, ABŞ İrana qarşı regiondakı hücumlara cavab olaraq 1 mindən çox raket-interseptoru istifadə edib. Buraya "Patriot" zenit-raket kompleksləri və THAAD raket müdafiə sistemləri üçün raketlər daxildir. Bu silahların sayı açıqlanmır və məhdud olduğu bildirilir.

Bizimyol.info