Təyyarə, iddialara görə, sərnişinin sevgilisinin yanında oturmaq üçün yer dəyişdirmə tələbi irəli sürüb aqressiv davranmasından sonra təcili eniş etməli olub.

Bizimyol.info xəbər verir ki, "MailOnline"ın məlumatına əsasən, kişi uçuşa hazırlaşma zamanı narazılıq etməyə başlayıb və "Spring Airlines" aviaşirkətinin reysi Yaponiyanın Narita beynəlxalq hava limanından havaya qalxdıqdan sonra da aqressiv davranışını davam etdirib.

Yerini dəyişmək tələbi rədd edilən sərnişinə stüardessalar izah ediblər ki, üç saatlıq uçuş ərzində olduğu yerdə qalmalıdır. Cütlüyün niyə yan-yana yerlər bron etmədiyi isə məlum deyil.

"MailOnline" yazır ki, kişi təyyarə havaya qalxdıqdan sonra da təxminən iki saat boyunca heyətlə mübahisə etməyə davam edib.

Kadrlar göstərir ki, bir neçə heyət üzvü vəziyyəti nəzarətə almağa çalışır, bundan sonra reys nəticədə marşrutdan çıxarılaraq geri qaytarılıb.

Yaranan problemlərə görə pilot Yaponiyanın aidiyyəti orqanlarına məlumat verməli olub və təyyarəni geri çevirərək Narita beynəlxalq hava limanına qayıtmağa məcbur qalıb.

Təyyarə gecə saat 23:00-da Naritaya endikdə, polis həmin kişini saxlayıb və reys ləngimə ilə başa çatıb.

Qadir, Bizimyol.info