Əsir və itkin düşmüş, girov götürülmüş vətəndaşlarla əlaqədar Dövlət Komissiyası I Qarabağ müharibəsində qeydiyyatlardan kənarda qalan itkin düşən şəxslərin ailəsinə müraciət edib.

Bizimyol.info xəbər verir ki, dövlət komissiyası xüsusən indiyədək qeydiyyatdan kənarda qalmış, yaxınları ilə bağlı DNT nümunələri verməmiş itkin ailələrini qısa müddətdə İşçi Qrupu ilə əlaqə saxlamağa, DNT nümunəsi verməyə çağırıb.

“Vətən müharibəsində əldə edilmiş tarixi Zəfərdən sonra Dövlət Komissiyası və müvafiq dövlət qurumlarına daxil olan çoxsaylı müraciətlərin təhlili göstərir ki, Ermənistanın Azərbaycana qarşı hərbi təcavüzü nəticəsində Birinci Qarabağ müharibəsində itkin düşmüş bir sıra şəxs aidiyyəti qeydiyyatlardan kənarda qalıb. Buna səbəb kimi, Birinci Qarabağ müharibəsindən sonrakı dövrdə bəzi itkin ailələrinin yaxınlarının rəsmi qeydiyyata alınması üçün Dövlət Komissiyasına müraciət etməməsi göstərilə bilər.

Qeyd olunanları nəzərə alaraq, Dövlət Komissiyası qeydiyyatdan kənarda qalmış və yaxınları ilə bağlı DNT nümunələri verməmiş itkin ailələrindən, o cümlədən itkin düşmüş şəxslərə dair məlumatı olan vətəndaşlardan qısa müddət ərzində İşçi qrupu ilə əlaqə saxlayaraq itkin yaxınları barədə məlumatları və DNT nümunələrini verməyi xahiş edir”, - müraciətdə qeyd olunub.

Aytən, Bizimyol.info