Bolqarıstanın yeni hökuməti Ukraynaya silah tədarükünü dayandırmaq niyyətindədir.

Bizimyol.info xəbər verir ki, bu barədə "Bloomberg" nəşrinin yazdığına görə, bu mövqe Avropa İttifaqının Rusiyaya təzyiq göstərərək müharibəni dayandırmaq cəhdləri ilə ziddiyyət təşkil edir.

Bolqarıstanın müdafiə naziri Dimitar Stoyanov bildirib: «Ukraynaya daha çox silah yox, daha çox insan lazımdır». O, «ədalətli sülhün, münaqişədəki hər iki tərəfin iştirakı ilə müəyyənləşəcəyini» vurğulayıb.

Nəşr qeyd edir ki, bu bəyanat yeni Baş nazir Rumen Radevın mövqeyi ilə üst-üstə düşür; Radev müharibənin döyüş meydanında bitməyəcəyini bildirib və Bolqarıstanın Avropada ortaq qərarların qəbulunda rolunu artıracağını vəd edib.

Qeyd edək ki, Bolqarıstan Aİ-də Sovet nümunəli sursatların ən böyük istehsalçılarından biridir və bu sursatlar müharibənin başlanğıcında Ukrayna üçün həyati əhəmiyyət kəsb edirdi. Hökumət həmin dövrdə birbaşa hərbi yardımı rəsmən rədd etsə də, bolqar sursatları digər Aİ ölkələrinə ixrac edilərək döyüş xəttinə çatdırılıb.

"Bloomberg"in məlumatına görə, 2022-ci ildən Bolqarıstan Ukrayna Silahlı Qüvvələrinə 13 paket hərbi yardım göndərib, lakin onların dəyəri və tərkibi gizli saxlanılıb.

Jurnalistlər xatırladırlar ki, Radev, əvvəlki Hərbi Hava Qüvvələrinin komandiri və yanvaradək prezident, Aİ-nin Ukraynaya hərbi dəstəyinə dəfələrlə etiraz edib. O, həmçinin Rusiyaya qarşı sanksiyaların Avropanın öz iqtisadiyyatına zərər verdiyini əsas gətirərək onları ləğv etməyi təklif edib.

Tammiqyaslı müharibənin başlanğıcında Bolqarıstan rəsmi olaraq Ukraynaya ağır silah tədarükünü rədd etmiş və bunu gizli şəkildə həyata keçirmişdi. Yalnız 2023-cü ilin yayında ölkənin Ukraynaya ağır texnika göndərmək barədə ilk rəsmi qərarı açıqlanıb.

2025-ci ilin əvvəlində məlum olub ki, Bolqarıstan Ukraynaya göstərdiyi hərbi yardım üçün müttəfiqlərdən 500 milyon avro kompensasiya alacaq.

Bizimyol.info