Fransa Xarici İşlər Nazirliyinin Avropa işləri üzrə nümayəndəsi Benyamin Addad bildirib ki, İrandakı münaqişə uzun müddət davam edə bilər və uzunmüddətli nəticələrə səbəb olacaq.

Bizimyol.info xəbər verir ki, bu barədə o, "CNews" telekanalına açıqlamasında deyib.

“Əlimdə kristal kürə yoxdur, amma hər halda uzun sürəcək və ciddi nəticələr doğuracaq müharibəyə hazır olmaq lazımdır. Bu münaqişə artıq bir aydır davam edir və bu gün çıxış yolu görünmür,” – deyə Addad qeyd edib.

Nümayəndə bildirib ki, ABŞ və İsrailin İrana qarşı apardığı müharibənin təsirləri bütün dünyada hiss olunur. Onun sözlərinə görə, Fransa neft məhsullarının tədarükündə yaranan problemlərdən daha az ziyan çəkib, lakin yanacaq qiymətlərinin artması ilə üzləşir.

Addad həmçinin diqqət çəkib ki, ABŞ-da da yanacaq qiymətləri ciddi problem olaraq qalır. Bu kontekstdə o, ABŞ Prezidenti Donald Trampı tənqid edib və digər ölkələri Hörmüz boğazının blokdan çıxarılması işini özbaşına həll etməyə çağırmasını düzgün saymayıb: “Problemi siz yaradırsınız, sonra başqalarını onu həll etməyə məcbur edə bilməzsiniz,” – deyə o vurğulayıb.

28 fevralda ABŞ və İsrail İrana qarşı hərbi əməliyyatlara başlayıb. Hücumlar ölkənin iri şəhərlərinə, o cümlədən Tehrana yönəldilib. İran İnqilab Keşikçiləri Korpusunun (elit qoşunlar) açıqlamasına görə, genişmiqyaslı qarşılıqlı əməliyyatlarda İsrail hədəfə alınıb.

İran hakimiyyəti həmçinin ABŞ, İsrail və İrana qarşı aqressiyanı dəstəkləyən ölkələrin gəmilərinə Ormuz boğazını bağlamaq qərarına gəlib. Münaqişə zamanı bir sıra tankerler Tehranın icazəsi olmadan boğazdan keçdiyi üçün hücuma məruz qalıb. 25 martda İran Xarici İşlər naziri Abbas Ərakçi bildirib ki, İran Hörmüz boğazından yalnız dost ölkələrə – Rusiya, Hindistan, İraq, Çin və Pakistan – keçməyə icazə verib. 1 aprel tarixində isə Tramp ABŞ-ın Hörmüz boğazı vasitəsilə tədarükə ehtiyacı olmadığını bildirib və neft idxal edən ölkələrə gəmilərinin təhlükəsiz keçidini özləri həll etməyi tövsiyə edib.