Böyük farmasevtik şirkətlər ABŞ-da qiymət təzyiqlərinin artması fonunda yeni dərmanların Avropa bazarına çıxarılmasını təxirə salmağa başlayıb.

Bizimyol.info xəbər verir ki, bu barədə "Reuters" agentliyi sahə nümayəndələrinə və ixtisaslaşmış təşkilatlara istinadən məlumat yayıb.

Mənbələrin bildirdiyinə görə, Ağ Ev reseptlə satılan dərmanların qiymətlərini aşağı salmaq üçün addımlar atır. ABŞ-da dərman qiymətləri ənənəvi olaraq digər inkişaf etmiş ölkələrlə müqayisədə xeyli yüksəkdir. Bu siyasət çərçivəsində ABŞ istehlakçıları üçün dərman qiymətlərinin digər ölkələrdə, o cümlədən Avropada tətbiq olunan səviyyəyə uyğunlaşdırılması — ən əlverişli şərt prinsipi əsasında — nəzərdən keçirilir.

Bu strategiya əczaçılıq şirkətləri üçün risklər yaradır: Avropada aşağı qiymətlər təxminən 700 milyard dollar həcmi olan ən böyük bazar olan ABŞ-da dərman qiymətlərinə təsir göstərə bilər. Nəticədə, istehsalçılar ABŞ-da qiymət təzyiqindən qaçınmaq üçün müəyyən dərmanların Avropa bazarına təqdimatını müvəqqəti olaraq təxirə salırlar.

Ekspertlər qeyd edirlər ki, bu vəziyyət şirkətləri Avropa bazarına çıxış ilə ABŞ-da yüksək gəlirliliyin qorunması arasında çətin seçim qarşısında qoyur. Eyni zamanda Avropa tənzimləyiciləri və səhiyyə siyasəti ilə məşğul olan qurumlar üçün də risk yaranır: pasiyentlərin yeni innovativ dərmanlara çıxışında gecikmələr baş verə bilər.

Bizimyol.info