Macarıstanın baş naziri Viktor Orbanın Kiyevə səfəri zamanı Rusiya və Macarıstanın xarici işlər nazirləri arasında telefon danışığı olub.

Bizimyol.info xəbər verir ki, Rusiya Federasiyası Xarici İşlər Nazirliyi bəyan edib ki, Sergey Lavrov və Peter Siyarto arasında söhbət Macarıstan tərəfinin təşəbbüsü ilə baş tutub.

Onlar beynəlxalq gündəmin aktual məsələlərini və Ukraynadakı müharibəni müzakirə ediblər. Ruslar deyirlər ki, nazirlər Kiyevin “bütün milli azlıqların hüquqlarını qeyd-şərtsiz təmin etməsi”nin vacibliyini vurğuladılar.

“Rusiya-Macarıstan siyasi dialoqunun əldə edilmiş səviyyəsi yüksək qiymətləndirilib. Vurğulanıb ki, ikitərəfli əməkdaşlıq son dərəcə çətin beynəlxalq vəziyyətə baxmayaraq, sağlam praqmatizm və qarşılıqlı fayda ruhunda mütərəqqi inkişaf etməkdə davam edir”, - deyə mesajda qeyd edilib.

Ukrayna mətbuatı yazır ki, Macarıstanın XİN rəhbəri rusiyalı həmkarından baş nazir Orbanın Kiyevdə olduğu müddətdə atəşin dayandırılmasını istəyib.

Ötən gün Ukrayna ilə bağlı qalmaqallı açıqlamaları ilə tanınan Macarıstanın baş naziri Viktor Orban Kiyevə gəlib. Onun Prezident Vladimir Zelenski ilə ticarət və transsərhəd əməkdaşlıqdan danışdıqlarını, həmçinin humanitar, infrastruktur və enerji məsələlərini müzakirə etdiklərini deyib.

Orban jurnalistlərə bildirib ki, tərəflər "bütün əvvəlki mübahisələri bağlamaq" və diqqəti gələcəyə yönəltmək istəyirlər. Eyni zamanda o, Ukraynanı atəşi dayandırmağa və Rusiya Federasiyası ilə danışıqlara başlamağa dəvət edib.

Yada salaq ki, Putin danışıqların şərtlərini Ukraynanın 4 regiondan tam imtina etməsi, Rusiyaya qarşı sanksiyaların ləğvi, eləcə də onun üçün neytral status adlandırıb.

Qadir, Bizimyol.info