Kremlin davamlı olaraq nüvə eskalasiyasına dair eyhamlarına baxmayaraq, NATO Rusiyanı özü üçün təhlükə kimi görmür.

Bizimyol.info xəbər verir ki, bunu Yaponiyanın “Yomiuri” qəzetinə müsahibəsində NATO-nun baş katibi Yens Stoltenberq deyib.

“Heç bir təhlükə yoxdur. Mən NATO-nun nüvə doktrinasına yenidən baxmasına ehtiyac görmürəm”, - deyə o bildirib.

Hazırda NATO nüvə silahının əsas daşıyıcısının - "F-16" qırıcılarından tutmuş "F-35"ə qədər dəyişdirilməsi prosesini davam etdirir. Stoltenberqin sözlərinə görə, bu proses də “adi hal kimi” gedir.

Eyni zamanda, NATO-nun baş katibi Qərblə Çin arasında münasibətlərdəki vəziyyəti şərh edib.

“NATO Çini düşmən hesab etmir, lakin bu, bizim dəyərlərimizə, maraqlarımıza və təhlükəsizliyimizə problem yaradır”, - deyən Stoltenberq bildirib ki, Çin “Tayvanı, qonşu ölkələri və Cənubi Çin dənizini təhdid edir”.

Ukrayna mətbuatının verdiyi məlumata görə, Rusiya Ukraynaya təcavüzü və Qərblə geosiyasi qarşıdurma çərçivəsində sistematik olaraq nüvə silahı ilə birbaşa və dolayı təhdidlərə əl atır. 2022-ci ilin sonunda ABŞ Rusiyanın işğal etdiyi ərazilərini itirməsi səbəbindən Ukraynaya potensial olaraq nüvə silahı ilə zərbə endirə biləcəyi ehtimalına “diqqətlə hazırlaşdı”. Rusiya təbliğatı ABŞ-ı belə bir təhlükənin mövcudluğuna inandırmaq üçün çox səy göstərdi.

Rusiyanın taktiki nüvə silahlarını NATO ərazisinə yaxınlaşdıraraq Belarusa daşıdığını da xəbər vermişdik. Eyni zamanda, Rusiya prezidenti Vladimir Putin Ukraynaya dəstək səbəbindən Alyansla daha geniş hərbi qarşıdurma ilə hədələyib.

Qadir, Bizimyol.info