Gürcüstan hökuməti ABŞ-la münasibətlərin yenidən qurulması üçün qərarlıdır.

Bizimyol.info xəbər verir ki, bunu Gürcüstanın baş naziri İrakli Kobaxidze parlamentdə görülən işlər barədə hesabat verərkən deyib.

“Gürcüstan hökuməti 2020-ci ildən bəri baş verən hadisələr fonunda məcburi hesab etdiyimiz ABŞ ilə münasibətlərin bərpası üçün çalışmaqda qərarlıdır. Biz həqiqətən də qarşılıqlı addımların olacağına ümid edirik. Təbii ki, Gürcüstan-Amerika münasibətlərinin inkişafı və dərinləşməsi Gürcüstan üçün strateji əhəmiyyət kəsb edir”, - deyə Kobaxidze qeyd edib.

Bundan əvvəl o, dəfələrlə ABŞ-ın Tbilisidəki keçmiş səfiri Kelli Deqnanı iki ölkə arasındakı münasibətlərdə mənfi rol oynamaqda ittiham etmişdi. Xüsusilə, o, səfiri 2020-2023-cü illərdə respublikada baş verən inqilabi proseslərə dəstək verməkdə ittiham edib. Eyni zamanda, Kobaxidze dəfələrlə ABŞ-ın yeni səfiri Robin Danniqanla iki ölkə arasında münasibətlərin xeyrinə səmərəli əməkdaşlığa ümid etdiyini bildirib.

Gürcüstanın ABŞ, eləcə də Aİ ilə münasibətləri bu ilin mayında Gürcüstan parlamentinin xarici agentlər haqqında qanunu qəbul etməsi fonunda pozulub. Dövlət Departamenti daha əvvəl bəyan etmişdi ki, qəbul olunmuş qanunla əlaqədar onlarla Gürcüstan vətəndaşına, o cümlədən hökumət, parlament üzvləri və onların qohumları, habelə hüquq-mühafizə orqanlarının əməkdaşlarına qarşı viza sanksiyaları tətbiq edir.

Qadir, Bizimyol.info